Një ditë pas ngjarjes së rëndë, janë konfirmuar identitetet e viktimave nga aksidenti tragjik që ndodhi në një kantier ndërtimi në Vjenë, pas rrëzimit të skelave.
Policia e Vjenës ka dhënë një deklaratë për Klankosova.tv, ku ka konfirmuar se 3 prej viktimave janë shqiptarë nga Kosova.
“Tre punëtorë të ndërtimit janë identifikuar si shtetas të Kosovës,” deklaroi zëdhënësi Phillip Hasslinger. Ai shtoi se arsyet e këtij aksidenti janë ende të paqarta.
Viktimat janë: Pajtim Bajrami, Asllan Musliu dhe Istref Zekaj.
Ambasada e Kosovës në Austri ka reaguar pas ngjarjes duke shprehur ngushëllimet për familjet e viktimave, duke premtuar se do të vazhdojë të informojë publikun për çdo zhvillim të mëtejshëm lidhur me rastin.
Kryeministri i Kosovës, Albin Kurti, gjithashtu ka reaguar përmes një postimi në rrjetin social Facebook, ku u ka shprehur ngushëllimet më të sinqerta familjarëve të viktimave, duke ndarë dhimbjen me ta në këtë moment të rëndë.
“Na ka tronditur thellësisht lajmi për vdekjen tragjike të disa personave në Austri. Sipas informacioneve zyrtare nga Ambasada jonë atje, tre prej tyre janë identifikuar si qytetarë të Republikës së Kosovës.
Në këto momente të rënda, shpreh ngushëllimet e mia më të sinqerta për familjet e viktimave dhe të gjithë ata që janë prekur nga kjo humbje e madhe.”, shkruan Kurti.
Ai gjithashtu ka bërë të ditur se është në komunikim të vazhdueshëm me Ambasadën e Kosovës në Vjenë, me qëllim ofrimin e mbështetjes së nevojshme për familjet e prekura nga kjo tragjedi.
Reagime të shumta ka patur edhe nga të tjera figura politike në Kosovë, si Kryetari i PDK-së, Bedri Hamza, deputeti i PDK-së, Enver Hoxhaj.
Ngjarja e rëndë ndodhi mesditën e së martës, gjatë kryerjes së punimeve për rikonstruksionin e një pallati të vjetër në Alsergrund të Vjenës.
