Skënderbeu-Dinamo, ja çfarë shkruajnë mediat ndërkombëtare
“Skënderbeu humbet me një gol të Dinamos në sekondat e fundit”. Ky është titulli i përdorur nga UEFA për disfatën 2-1 të korçarëve në ndeshjen e parë play-off të Champions League. Sipas faqes zyrtare të konfederatës europiane, goli i Pivariç në minutën e tretë shtesë kopromenton shpresat e korçarëve që të bëhen skuadra e parë shqiptare në fazën e grupeve të evenimentit më të rëndësishëm kontinental.
“Rezistenca e pashtershme e Skënderbeut të Korçës”, shkruante spanjollia “Marca”. Gazeta madrilene theksonte se “kampionët e Shqipërisë shkruan historinë në Champions” duke u bërë “ekipi i parë që arrin në play-off” dhe se “humbja 2-1 mban të hapura shpresat për sfidën e kthimit në Zagreb”.
Në artikullin e saj, “Marca” i ka dedikuar një artikull të gjatë historisë së klubit bardhekuq, nga emri i heroit që mban, deri te ecuria e viteve të fundit. Artikulli mbyllet me vëzhgimin: “Çfarëdo që të ndodhë në Kroaci, Skënderbeu ka sigurinë e pjesëmarrjes në grupet e Europa League. Një arritje e jashtëzakonshme. Një utopi e shndërruar në realitet.
Sipas iberikes “El Mundo Deportivo”, me fitoren në “Elbasan Arena”, Dinamo Zagreb është skuadra që së bashku me Shakhtar Donetsk shohin fazën e grupeve, shkruan supersport.al.
Në të njëjtën linjë edhe mediat kroate. “Me një këmbë në Champions: goli i Pivariç i jep Dinamos fitoren” shkruante “24 sata”. Edhe më konkrete “Sportske Jutarnji”, që përqendrohej te përfitimet financiare. Kjo gazetë përdorte titullin “Milionat e Champions janë edhe më pranë” dhe saktësonte se “bomba e Pivariç i siguroi ekipit nga Zagrebi kthimin e qetë në shtëpi”.
“HRT Sport” nënvijëzonte se “Dinamo festoi fitoren në Shqipëri, pasi ishte ekipi më i mirë në fushë”.
Rezultati është komentuar edhe nga mediat italiane. “Gazzetta Dello Sport” fliste për fitoren e Dinamo Zagreb, ashtu si edhe Valencia, Shakhtar e Celtic. “Ndeshje emocionuese në “Elbasan Arena”, me Skënderbeun që ndëshkohet në fund”, shkruante e përditshmja më e madhe përtej Adriatikut. Edhe sipas emitentit italian të “Eurosport”, “Hirushja Skënderbeu befasohet në sekondat e kohës shtesë”, transmeton Klan Kosova.
