Malazezi detyron turistin shqiptar të flasë në gjuhën malazeze, duke i vënë pistoletën në kokë
E përditshmja e Podgoricës, “Vjesti”, raporton nga Budva se si një malazez nën kërcënimin e armës kishte detyruar një turist nga Shqipëria të “mësojë” gjuhën malazeze.
Gojko B. (50), nga Budva, siç shkruan kjo gazetë, është arrestuar, sepse ka keqtrajtuar turistin shqiptar G.Sh (46) nga Shkodra, duke e kërcënuar me revole që “të mësojë të flasë në gjuhën malazeze”.
Ngjarja ka ndodhur të martën në mëngjes në një kafene të Budvës, jo shumë larg nga stacioni i autobusëve, raporton Koha Ditore.
Sipas kësaj gazete, shqiptari ishte duke ndenjur në një kafene dhe pasi kishte porositur kafenë, Gojku kishte nisur ta keqtrajtonte.
Atë, sipas raportimit, e kishte neveritur shqiptari derisa fliste shqip.
“Gojko B. ka qenë në gjendje të dehur dhe ka kërkuar prej shqiptarit që të përsërisë fjalët që ai i shqiptonte në gjuhën malazeze dhe ndërkohë ka nxjerrë revolen, të cilën ia ka drejtuar nga këmbët, nën tavolinë”, shkruan “Vjesti”.
Siç shkruan gazeta, fillimisht askush në kafene nuk e kishte vënë re se po ndodhte diç e çuditshme, deri sa kamerierja e ka parë se turisti i frikësuar po përsëriste pas fjalët që i shqiptonte Gojko.
Kamerierja i ishte afruar tavolinës dhe e kishte pyetur Gojkon se ç’po ndodhte, ndërsa ai më pas ishte ngritur nga tavolina, kishte filluar ta puthte shqiptarin dhe kamerieren, ndërsa turisti kishte ikur nga kafeneja.
Turisti më pas e ka paraqitur rastin në polici.
Policia pas marrjes në pyetje, Gojkut i ka caktuar masën e ndalimit për 72 orë, shkruan kjo gazetë, transmeton Tema .
