Më 6 janar, emisioni investigativ “Stop” në Tv Klan transmetoi një denoncim për një skemë mashtrimi të zhvilluar në rrjetin social TikTok, ku kërkoheshin fonde për një ndërhyrje shëndetësore të një fëmije. Në transmetimin e emisionit, Nik Kola shfaqej në një transmetim të drejtpërdrejtë në TikTok, bashkë me nënën e fëmijës, Xhevahire Laçi, duke kërkuar ndihmë financiare për të mbledhur para në llogarinë GoFundMe për Erjon Laçin.
Por një dëshmitar i identifikuar nga “Stop” ka bërë një denoncim, sipas të cilit, Nik Kola i ka kërkuar atij të gjejë një të sëmurë tjetër për të hapur një llogari GoFundMe, me qëllim që më pas paratë të ndaheshin përgjysmë. Kjo dëshmi ka ngritur dyshime të mëdha për mundësinë e një skeme mashtrimi të qëllimshme, që mund të ketë prekur shumë individë që kanë kontribuar për fëmijën e sëmurë.
