Skema e mashtrimit për pastrimin e parave nga ana e pronarit të Agon Channel Francesco Becchetti, përfshin edhe 9 shtetas shqiptarë ortakë apo administratorë të kompanive që italiani ka në Shqipëri, 5 prej të cilave janë vënë nën sekuestro.
Ortakja e tij, Erjona Troplini, e arrestuar një ditë parë, rezulton të jetë administratore e kompanisë “400 KV” dhe ortake me 20 % tek kompania “Cable System”. Që të dyja këto kompani janë nën sekuestro, me vendim gjykate. 7 ortakë apo administratorë të tjerë të kompanive janë marrë në pyetje.
Sipas hetimeve të deritanishme, rezulton se ata nuk kishin dijeni për aferat që bënte Becchetti në pastrimin e parave të pista.
Prokurorët kanë marrë dëshmitë e Hysni dhe Arvin Kamberit, ortakë në kompaninë “FUQI”. Kjo kompani drejtohet nga Mauro De Renzis, i cili është shpallur në kërkim ndërkombëtar nga Prokuroria e Tiranës, pasi dyshohet si personi që ishte në dijeni të skemës së pronarit të “Agon Channel”.
Hetuesit kanë marrë në pyetje edhe Vjollca Kamberin, ortake në kompaninë “ENERGJI SHPK”, që ka për administrator sërish Mauro De Renzin dhe nënën e Beccheti -t, Liliana Condomitti, e shpallur edhe ajo në kërkim, pasi rezulton pronare e kompanisë “CONSTRUZIONI SRL”, që fshihet thuajse pas të gjitha kompanive të Beccheti -t, raporton Klan.
Ilir Johollari është pyetur si administrator i kompanisë “VITRE”, që është e lidhur me “ALBANIABEG AMBIENT”, por që nuk janë nën hetim.
Gëzim Toska është pyetur në rolin e administratorit të “CABLE SYSTEM”, kompani tashmë e sekuestruar. Mimoza Sula është pyetur si administrator e “ALBANIANBEG AMBIENT” dhe Artan Arbana si administrator i “RENER”.
Skema dëshmon për një lidhje të të gjitha biznesve të Francesco Beccheti -t, të cilat, sipas hetuesve, funksiononin në mbështjetje të planeve të italianit për të pastruar para, që nuk dihet se ku e kanë burimin dhe për të fshehur taksat.
Hetimet e Prokurorisë kanë zbuluar se me anë të tyre, ai kishte pastruar miliona euro dhe kishte fituar miliona me anë të shmangies së taksave. E përfshirë në këtë skemë është edhe drejtuesja e një banke të nivelit të dytë, Pranvera Gjika, e arrestuar tashmë.
Të gjitha kompanitë e tij, për të cilat gjykata vendosi sekuestrimin, do të administrohen nga Agjencia e Administrimit të Aseteve të Sekuestruara.
Bëhet me dije se Gjykata e Tiranës i ka nisur vendimin e së hënës së kësaj gjykate dhe i kërkon që të caktojë një administrator për mbarëvajtjen e punës në këtë kompani.
Sipas vendimit, administrimi do kryhet deri në momentin që do të këtë një vendim të formës së prerë të Gjykatës së Apelit se çfarë do të ndodhë me investimet e Becchetti – t në vendin tonë.
Deri në një vendim nga Gjykata e Apelit, “Agon Channel” dhe katër kompanitë e tjera do të jenë në administrim të shtetit shqiptar./TV Klan/
