Fermerët që do të mbarështojnë viça do të përfitojnë nga 5 mijë lekë për çdo krerë. Qeveria ka miratuar me disa ndryshime në raport me vitet e mëparshme Skemën Kombëtare të Bujqësisë dhe Blegtorisë 2025.
“Për këtë jemi duke punuar që të kemi mbështetje edhe nga sektori bankar që kemi kosto të reduktuara për këto llogari të fermerëve përfitues”, u shpreh ministrja e Bujqësisë dhe Zhvillimit Rural Anila Denaj.
Ndërkohë skema thuajse mbetet e pandryshuar në drejtim të masave. Ata që kanë lopë do të marrin 10 mijë lekë për krerë, ndërsa ata që mbarshtojnë të imëta 1 mijë e 200 lekë. Me 1 mijë lekë do të mbështeten bletarët, ndërsa kultivuesit e perimeve, luleshtrydheve dhe rrushit do të marrin 200 mijë lekë për hektarë. Në skemë janë përshirë edhe bimët medicinale me 30 mijë lekë për hektarë, shkruan A2 CNN.
“Prioritet do të kenë aplikuesit që do janë anëtarë të një shoqërie të bashkimit bujqësor, ose bashkim operatorësh me të paktën shtatë anëtarë. Përjashtim bën rasti i serrave, do të jetë katër numri minimal i anëtarëve. Prioritet pra do të jetë për aplikuesit që vijnë si bashkësi operatorësh në të dy format dhe pjesa tjetër do të shpërndahet në mënyrë të barabartë për pjesën tjetër të aplikantëve që plotësojnë kriteret”, theksoi ministrja Denaj, transmeton A2 CNN.
Ministrja e Bujqësisë dhe Zhvillimit Rural, Anila Denaj tregoi edhe se kur do të nisë shpërndarja e masave mbështetëse për fermerët.
“Aplikimet pritet të çelen në fund të muajit mars me synimin që të gjenden hapësira për të mbështetur të gjithë aplikantët”, shtoi ministrja.
Edhe këtë vit fondi në dispozicion në Skemën Kombëtare të Bujqësisë dhe Blegtorisë mbetet i pamjaftueshëm për të mbështetur të gjithë fermerët./a2
