Persona rezidentë në qendrën zhvillimore në Shkodër dhe punonjës të këtij institucioni, i cilësojnë të pavërteta dhe inskenime skandalet e përfolura në këtë qendër. Në një prononcim për mediat disa prej personave që qëndrojnë në qendër shprehen se ambientet e shfaqura në video nuk i përkasin këtij institucioni dhe se ndaj tyre nuk është ushtruar dhunë nga punonjësit.
Ndërkohë një prej punonjëseve, Vera Macurreli thotë se video e shfaqur në media është inskenim nga ish-përgjegjësi i sektorit Leonard Hila, i cili u shkarkua nga puna për thyerje disipline, shkruan balkanweb.
Sipas saj Hila ka lidhur e filmuar të sëmurët në këtë qendër, duke e shitur më pas videon si skandal. Kamerat e të gjitha mediave janë lejuar të filmojnë sot ambiente në këtë qendër. Ditën e djeshme policia vuri në pranga drejtoreshën e qendrës Julia Cepi, si dhe një infermiere.
Prokuroria e Shkodrës zbuloi se 3 vajza në moshë madhore, me probleme mendore paciente në Qendrën e Zhvillimit në Shkodër kanë mbetur shtatzënë dhe kanë abortuar në mënyrë të paligjshme. Ky rezultat ka dalë në bazë të akteve të ekspertimit mjeko-ligjor, të kërkuara nga ana e Prokurorisë së Shkodrës.
Në bazë të hetimeve të Prokurorisë së Shkodrës ka rezultuar se ndaj pacientëve me sëmundje të shëndetit mendor në këtë qendër është ushtruar dhunë sistematike, shkruan Balkanweb.
Ndërkohë drejtoresha e qendrës së zhvillimit Julia Cepi, videon e shfaqur në emisionin investigativ “Stop” ku personat rezidencial të asaj qendre mbahen të lidhur me zinxhir e quajti të stisur dhe absurditet. Drejtorja Cepi u shpreh se video e shfaqur është një montazh dhe këtë ia lë organeve të drejtësisë për ta zbardhur se si është e vërteta.
