Gjykata e Tiranës ka dënuar 7 të parët për skandalin e rimbursimeve të ilaçeve, që i shkaktoi një dëm të konsiderueshëm arkës së shtetit. Hysni Roçi do të vuajë një dënim prej 4 vitesh burg, pasi është cilësuar si organizatori i kësaj skeme mashtrimi.
Sipas dispozitivit të gjykatës, vuajtja e dënimit për Roçin të fillojë nga dita e ndalimit në datën 4 qershor 2015 dhe të kryhet në një burg të sigurisë së zakonshme. Ndërkohë, Pjerin Xhuvani, drejtori i Fondit të Kujdesit Shëndetësor, u dënua me 3 vjet burg, por në fund iu konvertua me kusht që gjatë kohës së provës të mos kryejë vepër tjetër penale. Ndaj tij u hoq masa e arrestit shtëpiak, e vendosur më 7 qershor 2015, ndërsa i hiqet e drejta për të ushtruar funksione publike për një periudhë prej 3 vjetësh.
Gjykata ka dënuar Edlira Myrtezain me 3 vjet e 4 muaj burgim. Vuajtja e dënimit për të të fillojë nga dita e ndalimit në datën 4 qershor 2015 dhe të kryhet në një burg të sigurisë së zakonshme. Myrtezait i hiqet e drejta për të ushtruar funksione publike për një periudhë prej 3 vjetësh. Ndërkohë, Frida Lamçe u dënua me 1 vit e 2 muaj burgim. Iu hoq masa e arrestit shtëpiak dhe është liruar. Fatbardh Budo u dënua me 1 vit e 4 muaj burgim. Vuajtja e dënimit për të pandehurin Fatbardh Budo të fillojë nga dita e ekzekutimit të këtij vendimi dhe të kryhet në një burg të sigurisë së zakonshme.
Mimoza Tufi u dënua me 2 vjet burgim, por iu pezullua me kusht. Gjykata ka shpallur fajtor dhe ka dënua edhe Arens Spahiun, me akuzën e mashtrimit. Edhe ai u dënua me dy vjet burg, por iu konvertua me kusht. Gjykata ka deklaruar si të falsifikuara recetat origjinale së bashku me librezat shëndetësore të cilat u përkasin farmacive; Lundër, Berzhitë, Nutrimed 2012, Adelina, Hysni Roçi, të ardhura nga Kryeministria me shkresën me numër 2668 të datë 5 qershor 2015. Urdhërohet asgjësimi i këtyre dokumenteve.
Sipas dosjes, zyrtarët e Fondit dhe disa drejtues farmacish u përfshinë në një skemë mashtruese financiare me rimbursimin e medikamenteve, nga e cila i është shkaktuar shtetit dëm rreth 56 milionë lekë të reja. “Nga hetimet e prokurorisë rezulton se në krye të kësaj skeme qëndrojnë Hysni Roçi, pronar i disa farmacive në kryeqytet, si dhe ish-drejtori rajonal i Fondit, Pjerin Xhuvani. Këta dy shtetas, në pozicionet e tyre, kanë përfshirë në veprimtari të paligjshme edhe shtatë persona të tjerë, përkatësisht 4 drejtues teknikë farmacish dhe 3 punonjës të Fondit Rajonal të Tiranës”, thuhet në dosje.
Roçi u gjykua për mashtrim, ndërkohë Xhuvani për shpërdorim detyre. Nën akuzë për shpërdorim detyre dhe falsifikim dokumentesh u vunë edhe zyrtarja e Fondit, Edlira Mema. Frida Lamçe dhe Fatbardh Budo, po zyrtarë të Fondit të Kujdesit Shëndetësor, u akuzuan për falsifikim dokumentesh. Mimoza Tufi, Nikollaq Thanasi, Adelina Manaj dhe Arens Spahiu, drejtues teknikë të disa farmacive fiktive, akuzohen për mashtrim. Sipas dosjes, në bazë të veprimeve hetimore, rezulton se skema ka funksionuar në dy plane, të cilat lidhen me njëra-tjetrën, me qëllimin final përfitimin e paligjshëm të shumave të parave nga rimbursimi i ilaçeve.
“Hysni Roçi, pronar i disa farmacive, u ka marrë licencat drejtuesve teknikë të farmacive ‘Lundër’, ‘Bërzhitë’, ‘Adelina’ dhe ‘Nutrimed’, me qëllim përfaqësimin e tyre në raportet me Fondin Rajonal të Kujdesit Shëndetësor për përfitimin e rimbursimit të ilaçeve. Nga hetimi ka rezultuar se këto farmaci, gjatë periudhës shtator 2014 – mars 2015, kanë përfituar shuma të konsiderueshme në mënyrë të padrejtë, nga rimbursimi i ilaçeve që kanë deklaruar se kanë shitur, por që në të vërtetë rezulton se nuk kanë shitur ato sasi. Madje, rezulton se kanë deklaruar si të shitura ilaçe, të cilat nuk i kanë pasur asnjëherë në dispozicion”, thuhet në dosje.
Sipas saj, drejtuesit teknikë të farmacive, të cilët janë marrë të pandehur dhe dënuar së fundmi, kanë deklaruar gjatë hetimit, se nuk kanë kryer veprime me Fondin. Por, ka rezultuar e provuar se licencat e tyre ia kanë dhënë Hysni Roçit, i cili, nëpërmjet mashtrimit, ka rimbursuar në llogari të tyre shuma të ndryshme dhe në këtë mënyrë, edhe drejtuesit teknikë janë përfitues të kësaj skeme mashtrimi.
Në dosjen e prokurorisë, thuhet se Pjerin Xhuvani, në cilësinë e drejtorit rajonal të Fondit të Kujdesit Shëndetësor Tiranë, ka urdhëruar zyrtarë të tij për të formuluar akte fiktive kontrolli mbi farmacitë e sipërcituara dhe, në përfundim, i ka nënshkruar aktet e kontrollit, duke i hapur rrugë në këtë mënyrë rimbursimit të padrejtë këtyre subjekteve private. “Edhe zyrtarët e Fondit, të marrë të pandehur në këtë procedim, pavarësisht se ishin në dijeni të plotë të veprimeve të kundërligjshme, kanë nënshkruar akte kontrolle fiktive (të pakryera) për farmacitë, duke lejuar në këtë mënyrë përfitimin e padrejtë të rimbursimit monetar për subjektet private”, përfundon dosja e akuzës, e cila ka shkuar në gjykatë.
TË PANDEHURIT
Hysni Roçi
Pronar farmacish, u hetua me masë sigurimi “arrest në burg”. Akuzohet për mashtrim dhe u dënua me 4 vite burg
Pjerin Xhuvani
Ish-drejtor i Fondit Rajonal të Kujdesit Shëndetësor, hetuar fillimisht në burg dhe më pas në arrest shtëpie (Apeli). U dënua me kusht
Edlira Mara
Zyrtare e Fondit Rajonal të Kujdesit Shëndetësor, hetuar me masën e sigurimit “arrest në shtëpi”. Akuzohet për shpërdorim detyre
Frida Lamçe
Zyrtare e Fondit Rajonal të Kujdesit Shëndetësor, hetuar me masën e sigurimit “arrest në shtëpi”. Akuzohet për falsifikim dokumentesh
Fatbardh Budo
Zyrtare e Fondit Rajonal të Kujdesit Shëndetësor, akuzuar për falsifikim dokumentesh
Mimoza Tufi
Drejtore teknike e farmacisë “Lundër”, hetuar me masën detyrim për paraqitje. Akuzohet për mashtrim
Nikollaq Thanasi
Drejtor teknik i farmacisë “Nutrimed”, hetuar me masën detyrim për paraqitje. Akuzohet për mashtrim
Adelina Manaj
Drejtore teknike e farmacisë “Adelina”, hetuar me masën detyrim për paraqitje. Akuzohet për mashtrim
Arens Spahiu
Drejtor teknik i farmacisë “Bërzhitë”, hetuar me masën detyrim për paraqitje. Akuzohet për mashtrim.
Dita/d.i.
