Biletat për finalen e Kupës së Botës 2026, që do të luhet më 19 korrik në “MetLife Stadium” te New Jersey, po shënojnë çmime pothuajse të pabesueshme.
Në platformën zyrtare të rishitjes së FIFA-s, janë shfaqur çmime që kanë shkaktuar reagime të forta: disa vende në sektorin e parë, menjëherë pas portës, janë listuar me një çmim që i afrohet dy milionë eurove për secilën biletë.
Një shifër ekstreme që ngre pyetje të mëdha mbi aksesueshmërinë e eventit sportiv më të ndjekur në botë.
FIFA nuk i vendos drejtpërdrejt çmimet në tregun sekondar, por administron platformën zyrtare të rishitjes, duke përfituar një komision prej 15% si nga blerësi ashtu edhe nga shitësi. Kjo e bën organizatën pjesë ekonomike të gjithë zinxhirit të transaksioneve.
Megjithatë, sistemi tregon diferenca të mëdha brenda të njëjtit stadium. Në disa raste, vende në sektorin e tretë variojnë nga 20 mijë euro deri në mbi 118 mijë euro, edhe për distanca shumë të vogla mes ulëseve.
Ndërkohë, biletat që konsiderohen më të lira për finalen e Botërorit, arrijnë aktualisht rreth 10 mijë euro.
FIFA mbron modelin e çmimit variabël, duke e cilësuar atë në përputhje me standardet e industrisë sportive të Amerikës së Veriut. Sipas saj, ky sistem synon të reflektojë vlerën reale të tregut dhe të optimizojë si shitjet, ashtu edhe pjesëmarrjen në stadium.
