Si pasojë e reshjeve të shiut gjatë ditëve të fundit dhe në vijim të monitorimit të vazhdueshëm të situatës hidrometeorologjike, bazuar në raportimet e përditësuara nga bashkitë dhe institucionet përgjegjëse, situata e emergjencave civile në territorin e Qarkut Shkodër paraqitet deri në këto momente kryesisht e qëndrueshme. Reshjet kanë qenë me intensitet të ulët dhe në pjesën më të madhe të territorit kanë pushuar, ndërkohë që problematikat e evidentuara mbeten të lokalizuara dhe nën monitorim të vazhdueshëm nga strukturat përgjegjëse.
Në Bashkinë Shkodër është konstatuar rënie e prurjeve të lumit Drin. Në rrugën e Obotit vijon të ketë prezencë uji dhe është shtuar sipërfaqja e tokave me prezencë uji, por deri në këto momente nuk raportohen problematika të tjera.
Gjatë natës janë regjistruar reshje dëbore në zonat malore, konkretisht në aksin Bogë–Theth, ku janë marrë masat e nevojshme për pastrimin dhe kriposjen e rrugës. Si rezultat i reshjeve me intensitet të ulët, në Bashkinë Vau i Dejës aktualisht nuk raportohen problematika të emergjencave civile. Për rastet e evidentuara më herët të banesave me prezencë uji, kanë nisur procedurat për përgatitjen e dokumentacionit për dhënien e mbështetjes, ndërsa bashkia ka ofruar ndihmë emergjente për çdo familje të prekur apo të rrethuar nga uji.
Situata në Bashkinë Malësi e Madhe paraqitet e qetë, me reshje të pakta shiu dhe reshje dëbore në zonat malore të Njësisë Administrative Kelmend, pa problematika të tjera. Megjithatë, në fshatin Vukpalaj, rruga e aksesit është e bllokuar nga uji në disa ura hyrëse në fshat, me nivel mbi 3 metra, ndërsa pjesa tjetër e zonës mbetet e aksesueshme.
Në Bashkinë Pukë nuk raportohen probleme të emergjencave civile; reshjet kanë pushuar dhe temperaturat janë të ulëta.
Sipas të dhënave nga Drejtoria e Ujitjes dhe Kullimit Lezhë, reshjet e regjistruara gjatë 24 orëve të fundit kanë qenë 25 mm, ndërsa nivelet e ujit në pikat monitoruese mbeten nën kuotat kritike. Hidrovoret vijojnë funksionimin me kapacitet të plotë dhe argjinaturat nuk paraqesin problematika.
Situata në territorin e Qarkut Shkodër mbetet e kontrolluar dhe nën monitorim të vazhdueshëm nga strukturat e Emergjencave Civile, në bashkëpunim me institucionet vendore dhe qendrore, me qëllim garantimin e sigurisë së qytetarëve.
