Reshjet dhe shkarkimet nga hidrocentrali i Vaut të Dejës kanë shkaktuar përmbytje në disa njësi administrative të zonës së Shkodrës. Si pasojë e kësaj situate është mbledhur mbrëmjen e sotme, shtabi i emergjencave civile në prefekturën e qarkut Shkodër.
Prefekti Çesk Millja është kundër kryebashkiakes Voltana Ademi për shpalljen e emergjencës në njësinë Ana e Malit dhe Dajç. Sipas prefektit nuk ka përkeqësim te situatës, ndërsa shkarkimet nga hidrocentrali i Vau i Dejës janë 1300 metër kub ne sekondë.
Prefekti ka thënë se ne rast të përkeqësimit të situatës janë te gatshme masat për banoret, por për momentin sipas tij nuk ka nevojë për panik dhe situata po monitorohet.
Sipas Çesk Millja përmbytja ne Anen e Malit vjen si shkak i prurjeve natyrale te ujërave nga lumi Drin dhe jo nga shkarkimet nga HEC-et
Nderkohe Ministria e Mbrojtjes ka dhënë informacion për situatën e përmbytjeve në zonën e Shkodrës si pasojë e përmbytjeve gjatë 24 orëve të fundit. Nga informacioni i dhënë deri në orën 20:30, sipas Ministrisë së Mbrojtjes janë disa hektarë tokë e përmbytur në disa njësi administrative dhe po monitorohet situata.
Njoftimi i plotë i ministrisë së Mbrojtës:
Gjatë 24 orëve të fundit në të gjithë territorin e Qarkut kanë vazhduar reshjet periodike të shiut të cilat janë shoqëruar me shkrirje të dëborës dhe fryrjen e liqeneve, lumenjve dhe përrenjve.,
Sipas informacionit nga terreni, kemi sipërfaqe të tokës së përmbytur, kryesisht tokë bujqësore në Bashkinë Shkodër, kryesisht në Njësinë Administrative Bushat, Bërdicë, Dajç, Velipojë, Ana e Malit, Gur i Zi dhe Malësi e Madhe.
Bashkia Shkodër:
Rruga për në fshatin Bruçaj, Njësia Administrative Pult është e bllokuar, po ashtu dhe nga fshati Kir deri në Xhan dhe nga fshati Pog deri në qendër të Njësisë Administrative Pult. Rruga për në fshatin Mazrek të Njësisë Administrative Gur i Zi, është e bllokuar. Gjithashtu në rrugën Gur i Zi – Vukatan ka prezencë uji rreth 30 cm.
Në Njësinë Administrative Ana e Malit janë të përmbytura mbi 300 ha. Ka prezencë uji në fshatin Obot. Rrezikohet ujësjellësi Oblikë. Përrenjtë kanë prurje të mëdha.
Problem shqetësues paraqiten edhe punimet që po bëhen në rrugën e Velipojës pasi në fshatin Trush janë bllokuar kanalet anësore dhe ka përmbytje të tokave që janë afër rrugës. Ka prezencë uji edhe në fshatin Gomsiqe të Njësisë Administrative Velipojë.
Nga institucioni i prefektit vazhdon të monitorohet situata dhe po bashkëpunohet intensivisht me strukturat e Bashkive dhe institucione si: HEC-et, DVP, OSHEE, KESH, Drejtorinë Rajonale të Kullimit, Autoritetin Verior dhe strukturat e ushtrisë, për mbajtjen në kontroll të situatës dhe mirëmenaxhimin e situatave të pritshme.
Aktualisht kemi përqendruar një mjet të ushtrisë në fshatin Obot për të bërë transportimin e komunitetit, meqenëse segmenti rrugor që lidh Njësinë Administrative me këtë fshat është izoluar nga uji.
Në prefekturat e tjera nuk ka probleme (Tiranë dhe Durrës), pasi ka rënë niveli i ujit në rrugë dhe situata po normalizohet. (Balkanweb)
