Kreu i Inspektoratit të Lartë të Drejtësisë, Artur Metani, ka theksuar se sistemi gjyqësor po përballet me një trysni antikushtetuese për të ushtruar detyrën e tij në mënyrë të pavarur.
Ai ka denoncuar fyerjet ndaj magjistratëve, të cilat janë bërë një pjesë e rëndësishme e kritikave ndaj pushtetit gjyqësor. Sipas Metanit, vetëpërmbajtja e magjistratëve nuk duhet të konsiderohet si dobësi, por si një akt respekti ndaj lirisë së shprehjes dhe shtetit ligjor.
Ai gjithashtu theksoi se deontologjia politike nuk duhet të ndikojë në sjelljen e magjistratëve, duke mbajtur një qëndrim të qartë për ndarjen e pushteteve.
Kreu i Inspektoratit të Lartë të Drejtësisë, Artur Metani: U bë kohë që sistemi gjyqësor është nën një trysni, për mua antikushtetuese, për të ushtruar detyrën ose jo, në një formë të caktuar. Nga të gjithë. U bë kohë që fyerjet për magjistratët janë pjesë më e konsiderueshme e artikulimit kur vjen puna tek kritikat për pushtetin gjyqësor. Natyrisht, të papranueshme këto në çdo pikëpamje. Kjo i vë magjistratët në provë të vështirë. Por, testi i pavarësisë, i ndarjes se pushteteve dhe i shtetit te se drejtës, nuk është vetëm retorikë.
Ndryshe nga pushtetet apo institucionet e tjera, magjistratët dhe institucionet e pavarura të drejtësisë e kanë një lloj kufizimi, që vjen me detyrën për t’u treguar të përmbajtur, edhe kur sulmohen pa të drejtë. Mes zërave të fortë publikë, kjo i bën që të perceptohen si të dobët, por nuk është aspak ky rasti. Vetëpërmbajtja nuk duhet ngatërruar me dobësinë. Pavarësisht deklaratave të aktorëve të ndryshëm publikë, magjistratët nuk duhet të harrojnë se reagimet publike nuk janë pjesë e funksionit të tyre. Por, vetëpërmbajtja po! Vetëpërmbajtja nuk është dobësi e asnjë lloj natyre, por respekt për lirinë e shprehjes në demokraci, është largësi kushtetuese nga natyra politike e pushteteve të tjera. Deontologjia politike nuk duhet të diktojë sjelljen e magjistratëve. Në këtë rast, besoj se thelbi i shtetit ligjor dhe i vlerave evropiane është pikerisht mënyra sesi sillemi, edhe kur nuk biem dakord me vendimet e njëri-tjetrit.
