Diego Pablo Simeone largon për momentin Interin nga planet e tij.
Në një intervistë për të përditshmen spanjolle Marca, trajneri argjentinas Diego Simeone deklaroi se nuk e përjashton mundësinë që të rinovojë kontratën me Atletico Madrid edhe pas vitit 2018.
“Që nga momenti kur u mësua se reduktova afatin e kontratës dhe deklarova se një ditë do drejtoj Interin, të gjithë më shohin larg Atletico Madrid-it. Por unë mund të them se në 2 vjet mund të ndodhë që të rinovohet kontrata dhe për mua do të jetë e vështire të gjej një skuadër më të mirë se Atletico”, tha Simeone.
Simeone pranoi se vendimtare në reduktimin e afatit të kontratës se tij, u bë finalja e Ligës së Kampionëve ndaj Realit në Milano, me Atleticon që e humbi në penallti, një vendim i cili po ndikon edhe në sezonin aktual të Los Colchoneros në La Liga.
“Kam folur me stafin tim, bëhet fjalë për një vit të veçantë -vijoi Simeone- është e vërtetë, finalja e Ligës së Kampionëve ishte një goditje e fortë dhe kjo është normale. Frika se nuk arrijmë objektivat ekziston gjithnjë, por unë nuk shqetësohem aq shumë. Edhe fakti që nuk do të mund të bëjmë blerje nuk përbën ndonjë problem për mua, pasi jam mësuar me situatat e vështira. Ajo që ka rëndësi është që të shfrytëzojmë sa më mirë futbollistët që kemi në dispozicion”. /a.m.
