Nga Ben Andoni
Që Vetëvendosja është baza kryesore e Opozitës në parlamentin e Kosovës, ky s’përbën më argument. Qysh në krijimin e saj, falë Albin Kurtit, ka pasur gjithnjë artikulime interesante, po më e veçantë mbase për publikun shqiptar të përtej kufirit ka qenë njëra:Vetëvendosja jo vetëm paralajmëroi për Zajednicën (kohë më parë), asosacionin e komunave serbe në Kosovë, por edhe të gjithë strukturën që po e mundësonte atë. Tash, kur Zajednica është arritur dhe politika kosovare rreket të konfuzojë publikun për statusin e saj, një gjë të vjen ndërmend: sa të besueshëm janë vallë në qeverisje shqiptarët. Kur e përcaktojmë elementin kombëtar duam të sjellim ndërmend edhe se shumë fenomene i kemi njësoj. Politikanët tanë, vendosin shumë kohë para se t’i përfundojnë gjërat. A ka mundësi të zhbëhen gjërat? I takon
Opozitës të kundërshtojë dhe të gjejë elementët e duhur për ta vendosur qeverinë në pozicion të vështirë, por edhe në kushte që të mendojë mirë vendimet që merr. Vetëvendosja me frymën e saj, shpesh radikale, po e mëson Opozitën shqiptare të Kosovës dhe Shqipërisë se nëse nuk ka aksion do të sfumohesh. Kjo ka bërë që qeveria e Kosovës veç vezëve të së martës, që mori mbi kokë, të kishte edhe paralajmërimin se gjërat s’do t’i ketë lehtë.
Ndërkohë, as edhe minimumin e mundshëm nuk ka bërë partia e udhëhequr nga Basha, kryetari ynë i Opozitës. Më shumë opozitë bën Berisha, ish-kryeministri shqiptar i rrëzuar nga votat e 1 milion njerëzve dhe në perëndim të moshës së tij, sesa njerëzit e vet të partisë. Pa asnjë ide dhe thjesht duke ndjekur lajthitjet jo të pakta të qeverisë së sotme Rama, ata janë bërë më të mërzitshëm sesa kur ishin në fuqi. E të mendosh se qeverisjen e sotme të Ramës mund ta godasësh hapur dhe nëse do të kishe shumë më afër specialistë, mund ta trandje, atëherë të vjen ndërmend Vetëvendosja, që kur nuk ia del dot vogëlsirave të kreministrit Isa Mustafa, e mballosh me vezë. Por që ta bësh këtë do dinjitet dhe kauzë, një gjë që realisht Opozita shqiptare në Tiranë e ka ende të munguar në princip.
