Nga Artur Ajazi
Partinë Demokratike e presin “punëra të mëdha” pas 31 Gushtit. Ajo do të nisë pas javës së parë të Shtatorit, rrugëtimin e gjatë si opozitë në mandatin e tretë të saj. Dhe sikur të mos mjaftonin kusuret e fushatës, listave, hatërmbetjeve, incidenteve, humbjes, grupimit kundër dalë nga gjiri i partisë, kryetarit të saj i duhet të përballojë edhe një sfidë tjetër. Largimin me “stil” të Sali Berishës.
Dhe më e mira, do të ishte në rast se ai, largohet vetë, pa bujë dhe zhurmë. Por kjo gjë nuk ka gjasa të ndodhë. Mandati i deputetit, mbetet e vetmja mburojë e ish-kryetarit të asaj partie dhe ish-kryeministrit të vendit. Mandatin e deputetit, askush nuk mendon se Sali Berisha do ta dorëzonte vetë, për të mos rrezikuar partinë e tij.
“Pas meje le të bëhet qameti”. Ndoshta kjo shprehje do ti shkonte situatës dhe pozicionit ku ndodhet aktualisht ish-kryeministi vendit. Për këto dhe shumë halle dhe probleme të tjera, Lulzim Basha duhet të mendohet mirë, sepse nuk është aspak e lehtë që pas ardhjes së zotit Reeker, të biesh në “gjumë” dhe ti thuash vehtes “ja hodha edhe kësaj here”.
Sikur kjo verë të mos mbaronte kurrë për Lulin dhe Partinë Demokratike, ndoshta do të ishte një shans i artë. Por ja që pas 68 ditësh, mandatfituarit e Lulit do të ulen në vendet e tyre në Parlamentin e ri dhe do të nisin “betejën” si opozitarë. Edhe ata ashtu si kryetari Basha, e kanë mbi shpinë problemin dhe fatin e Doktorit. Nga zgjedhja e tij, varet afrimi me amerikanët, ose largimi i pakthyeshëm prej tyre.
E ndërsa mandatfituesit e rinj të Lulit, merren në këto ditë të nxehta vere me “aleancën për teatrin”, apo me emërimet e ndonjë zv/ministri të ri nga Edi Rama, duket se “patatja e nxehtë” e Doktorit, akoma nuk i ka djegur duart atyre. A thua ta detyrojnë Sali Berishën të dorëzojë mandatin e deputetit, a thua do ta mbështetin Lulzim Bashën në ndonjë propozim të paramenduar për ti thënë “JO” pranisë së tij në grupimin e ri parlamentar të PD ?
Të gjitha këto, dhe shumë të tjera natyrisht janë pyetje që po presin përgjigje të sinqertë nga kryetari i PD. As vajtja në Hollandë, apo në bregdet, nuk do ta qetësonte Lulzimin nga ky ankth, nga ky mision që duket i pamundur për një kryetar partie si ai.
Ndoshta ashtu siç thuhet lart e poshtë se “ai ka kopsitur letrat për Doktorin”, do të duhet të shohim se si do ta përballojë edhe betejën e fundit me “babain politik”, për të shpëtuar në fund të fundit, emrin dhe karierën e tij.
