Si u shuan ëndrrat e Kryemadhit për të drejtuar Ministrinë e Brendshme?

Kryetarja e LSI-së Monika Kryemadhi, pretendonte të drejtonte Ministrinë e Brendshme në “Qeverinë Basha”.

Lulzim Basha dhe Monika Kryemadhi firmosën në muajin Mars 2021, marrëveshjen për zgjedhjet e 25 prillit. Dokumenti me 13 pika parashikonte rimëkëmbjen ekonomike, goditje të oligarkëve, përmbushje të kushteve për hapjen e negociatave si dhe qeverisje me shtet ligjor.

I njëjti dokument parashikonte që që dy partitë në rast të qeverisjes të transformojnë ekonominë, të angazhohen për hapjen e negociatave me Bashkimin Europian dhe po ashtu ti japin shans të rinjve këtu për të ndaluar eksodin jashtë vendit.

Sipas marrëveshjes do të konkurohej me dy lista (PD- AN + LSI) për të realizuar një përfaqësim sa më të plotë dhe sa më gjithëpërfshirës politiko –elektoral dhe kurorëzimin e fitores së opozitës në zgjedhjet e 25 Prillit.

Pas kësaj marrëveshje, të entuziasmuar se do të fitonin Kryemadhi, filloi të thurte ëndrra për të marrë drejtimin e Ministrisë së Brendshme.

Ajo u shfaq në fushatë elektorale duke u bërë thirrje qytetarëve për revolucion. “Ngrehuni dhe bjeruni, korrini dhe shtypini” të gjithë ata që grabisin shqiptarët”, trumbetonte më zë të lartë Kryemadhi nga Jugu në Veri.

Dhe aq ëndrra kishte thurur për t’u bërë Ministre e Brendshme saqë Fan Nolin e ngatërroi me Migjenin.

Për të s’kishte rëndësi se kush i kishte shkruar vargjet me të cilat, ajo bënte thirrje për revolucion, për të duket se kishte rëndësi që me çdo çmim të merrte Ministrinë e Brendshme.

Një javë para zgjedhjeve në emisionin “Open”, Kryemadhi e tha më në fund edhe ëndrrën e saj.

Gjatë një debatit tek i njëjti emision, kryetarja e LSI-së Monika Kryemadhi  ka folur edhe për këtë ëndërr, duke mohuar të kishte thënë me zë të lartë se donte të bëhej Ministre e Brendshme, por duke pohuar se e kishte menduar një gjë të tillë.

E pyetur nga moderatorja Eni Vasili, Kryemadhi u shpreh se nuk është ky shqetësimi kryesor i saj dhe i opozitës. Për Kryemadhin, shqetësimi kryesor është se si të sigurojë punë të mirëpaguara për të rinjtë dhe të rejat shqiptare.

“Unë nuk e kam bërë deklaratë këtë, por nuk them që nuk e marr, kështu që mos u shqetëso. Ajo që unë mendoj dhe është shumë e rëndësishme nuk është problemi se kush do të jetë Monika Kryemadhi, e rëndësishme është që jemi bashkë në këtë betejë që çon përpara ndryshimin, i cili nuk ka kthim pas, për hir të së vërtetës”, u shpreh Kryemadhi.

Po, rezultatet e 25 Prillit, ia shuan përfundimisht ëndrrën për t’u bë Ministre e Brendshme.

Qytetarët e dëgjuan thirrjen e saj për revolucion dhe e përkthyen me vota kundër LSI.

Dhe për pasojë LSI e Kryemadhit mori vetëm katër mandate deputetësh, nga 19 që kishte legjislacionin e kaluar.

Në këto rrethana Kryemadhi nuk u bë dot pasardhëse e Fatmir Xhafajt, Sandër Lleshajt dhe as e Bledi Çuçit.

Me ëndrrën në sirtar për Ministrinë e Brendshme ajo pranoi humbjen, dhe u zhduk nga skena politike, për t’u shfaqur pas një kohe të gjatë si zonjë e parë në krah të bashkëshortit te saj, Presidentit Ilir Meta./cna

/m.j