Këshilli Administrativ i Institutit të Sigurimeve Shoqërore ka shtuar kategoritë e pensionistëve që do të përfitojnë nga ngushtimi i diferencës së pensioneve për pensionet e dala në harkun kohor ’93-’96. Në këtë vendim preken pagesat e pleqërisë të atyre qytetarëve që kanë dalë në pension në periudhën 1 tetor 1993 – 31 dhjetor 1996 dhe kanë punuar në punë të vështira, si industri nafte, metalurgji dhe industri tekstili.
Zv.drejtori i Institutit të Sigurimeve Shoqërore, Ali Emini tregon se janë 3 mijë persona që do të përfitojnë nga ky vendim dhe kanë punuar në punë të vështira, ndërsa, sa i përket masës që ata do të përfitojnë, ajo nuk është e barabartë, por varet nga masa e pensionit që ata kanë pasur. “Shtesa e miratuar për pensionet e lidhura para vitit 1996 nuk është fikse për të gjithë. Ajo do të përcaktohet në varësi të faktit se në cilin grup bëjnë pjesë përfituesit, po ashtu datës kur kanë dalë në pension, si edhe masës fillestare të pensionit”, – thekson zv.drejtori i ISSH-së, Emini.
Vendimi i qeverisë, i cili u miratua në qershor 2016, i ndan përfituesit në 6 kategori të ndryshme, e më konkretisht: 1 tetor deri në 31 dhjetor 1993, 1 janar deri në 30 shtator 1994, 1 tetor 1994 deri në 30 prill 1995, 1 maj deri 30 shtator 1995, 1 tetor 1995 deri në 31 mars 1996 dhe 1 prill deri në 31 dhjetor 1996. Sa i takon masës mesatare të përfitimit, këta 3 mijë veta vetë, që kanë dalë në pension pleqërie në harkun kohor 1993- 1996, do të përfitojnë rritje me një shumë mesatare prej 840 lekësh në muaj, ndërsa ata që kanë kaluar tashmë në pension të plotë pleqërie, do kenë një shtesë që arrin në vlerën e 4 mijë lekëve në muaj.
Z. Emini, Këshilli Administrativ i ISSH-së në mbledhjen e së mërkurës ka bërë një ndryshim në lidhje me kategoritë e pensionistëve që kanë dalë në pension në harkun kohor ’93-’96 dhe përfitojnë nga vendimi “Për ngushtimin e diferencave të pensioneve”; përse u bë tani ky ndryshim?
Këto ndryshime kanë efekte financiare. Për shkak se mundësitë financiare të Institutit të Sigurimeve Shoqërore ekzistonin, atëherë Këshilli Administrativ vendosi që të realizojë një ngushtim të diferencave në masën e pensioneve edhe për profesione të tjera që u përgjigjen pensionistëve që kanë dalë në pension në periudhën ’93 ’96. Për shembull, personat që kanë punuar në punë të kategorisë II apo të kategorisë I që klasifikohen si profesione të vështira. Siç është metalurgjia dhe industria e tekstilit.
Sa është numri i personave që përfitojnë nga ky ngushtim i diferencave të pensioneve?
Normalisht, pjesa më e madhe ka përfituar nga vendimi fillestar, se ishin rreth 20 mijë persona. Ndërsa nga ky ndryshim i fundit do të përfitojnë rreth 3 mijë veta që kanë punuar në profesione të vështira, pra kanë punuar në industrinë e naftës, në metalurgji dhe industri tekstile.
Sa do jetë masa që përfitojnë këta persona?
Vendimi i Këshillit të Ministrave ka bashkëngjitur edhe tabelat përkatëse të masës që këta persona përfitojnë. Por duhet theksuar se, masa e përfitimit varet nga masa e pensionit që ata kanë pasur. Pra përfitimi i tyre varet nga pensioni që atyre u ka dalë në vitin përkatës, 1993, 1994, 1995 si dhe 1996. Shtesa e miratuar për pensionet e lidhura para vitit 1996 nuk është fikse për të gjithë. Ajo do të përcaktohet në varësi të faktit se në cilin grup bëjnë pjesë përfituesit, po ashtu datës kur kanë dalë në pension, si edhe masës fillestare të pensionit. Për këto arsye, diferenca e pensionit që ata përfitojnë nuk është e barabartë. Pavarësisht se sa kanë punuar në profesione të vështira për një kohë të caktuar, ka persona që i kanë gjithë vitet e punës në profesion të vështirë, ka persona që kanë punuar vetëm minimumin e vjetërsisë në një profesion të vështirë, dhe pjesën tjetër e kanë në punë që nuk konsiderohet e vështirë. Ndaj e theksoj sërish, se masa e përfitimit varet nga masa e pensionit që kanë pasur.
A pritet të ketë kategori të tjera që do përfitojnë nga ngushtimi i diferencës së pensioneve?
Jo, nuk do ketë kategori të tjera. Shtimi i këtyre kategorive me këta 3 mijë persona është ndryshimi i fundit që u bë, pasi kjo ka kosto financiare.
BW/d.i.
