Një rrjet kriminal me bazë në Suedi, i njohur si Foxtrot Network, po përdor adoleshentë të rekrutuar përmes rrjeteve sociale për të kryer vrasje me pagesë dhe sulme të tjera të dhunshme në vende të ndryshme të Europës. Fenomeni, i cilësuar nga Europol si “Violence-as-a-Service” (VaaS) ose “dhunë si shërbim”, po konsiderohet një nga format më të rrezikshme të krimit të organizuar.
Sipas Europol, grupi u ofron të rinjve shuma të mëdha parash për të kryer atentate, ndërsa udhëzimet ua jep përmes aplikacioneve të koduara dhe në një mënyrë që ngjan me lojërat elektronike. Në shumë raste, autorët arrestohen para se të marrin pagesën.
Një nga rastet më tronditëse ndodhi në një periferi të Stokholmit në shkurt të vitit të kaluar. 18-vjeçari Atilla Azimov qëlloi për vdekje 20-vjeçarin Murad Abdelkader, një student që po kthehej në shtëpi pas turnit të punës në McDonald’s. Hetimet zbuluan se viktima ishte vrarë gabimisht, pasi atentatori kishte marrë një objektiv të gabuar. Dyshohet se vrasja ishte porositur nga rrjeti Foxtrot kundrejt pagesës.
Që prej vitit 2022, autoritetet besojnë se Foxtrot ka qenë përgjegjës për rreth 35 vrasje, si edhe për disa sulme dhe tentativa sulmesh ndaj objektivave izraelite në Europë, përfshirë sulme me granata dhe eksploziv.
Për të përballuar këtë fenomen, Europol ka krijuar grupin operativ OTF GRIMM, ku marrin pjesë 11 shtete europiane: Belgjika, Danimarka, Finlanda, Franca, Gjermania, Islanda, Holanda, Norvegjia, Spanja, Suedia dhe Mbretëria e Bashkuar.
Drejtuesi i Qendrës Europiane kundër Krimit të Organizuar në Europol, Andy Kraag, e ka cilësuar këtë praktikë si “delegim të llogaritur të vrasjeve”, ku organizatat kriminale shfrytëzojnë të rinj të pambrojtur për të kryer krime të rënda.
Në qendër të këtij rrjeti është Rawa Majid, lideri i Foxtrot, i cili fillimisht u largua nga Suedia, më pas nga Turqia dhe aktualisht besohet se ndodhet në Teheran, kryeqytetin e Iranit.
Sipas policisë dhe gazetarit investigativ suedez Diamant Salihu, lidhjet e Foxtrot me regjimin iranian nisën pas tetorit 2023, kur Majid u vendos në Iran. Salihu pretendon se Majid arriti një marrëveshje me autoritetet iraniane për të qëndruar lirshëm në vend, me kusht që rrjeti i tij të kryente sulme ndaj kundërshtarëve të regjimit, përfshirë disidentë, gazetarë dhe objektiva izraelite.
Për këtë arsye, Mbretëria e Bashkuar vendosi sanksione ndaj Rawa Majid dhe rrjetit Foxtrot në prill të vitit 2025.
Një tjetër rast që tregon mënyrën e funksionimit të këtij rrjeti është ai i norvegjezit Johannes Natland. Në moshën 18-vjeçare ai u rekrutua në internet për të kryer një vrasje në Angli, kundrejt një pagese prej 270 mijë koronash norvegjeze, rreth 21 mijë paund.
Natland, i cili kishte kaluar probleme me drogën dhe shëndetin mendor, u kontaktua fillimisht nga një adoleshent me pseudonimin “UnknownHustler”, ndërsa më pas u drejtua nga një tjetër i mitur me emrin “Generalen”. Më vonë ai u vu në kontakt me një anëtar të Foxtrot që përdorte pseudonimin “Agent 47”, emër i marrë nga videoloja e njohur “Hitman”.
Sipas hetimeve, “Agent 47” i siguroi biletën e udhëtimit për në Britani, e ndihmoi të pajisej me pasaportë emergjente dhe e udhëzoi gjatë gjithë rrugës përmes aplikacionit Signal.
Pas mbërritjes në Huddersfield, një tjetër bashkëpunëtor i dërgoi harta dhe video që tregonin vendndodhjen e armëve të fshehura në pyll, si edhe të një sasie parash të fshehur pranë një tuneli.
Natland u arrestua mëngjesin pas mbërritjes në Angli, përpara se t’i komunikohej identiteti i objektivit. Hetuesit britanikë po përpiqen ende të zbulojnë nëse atentati ishte pjesë e luftës mes grupeve kriminale apo një sulm me motive politike i lidhur me regjimin iranian.
