Hapja e Kanalit Pinglu, me gjatësi 134.2 kilometra, në Rajonin Autonom Guangxi-Zhuang të Kinës jugore, pritet të forcojë lidhjet tregtare dhe logjistike midis rajoneve jugperëndimore të Kinës dhe Azisë Juglindore.
I planifikuar të hapet më 16 shtator, ai lidh rrjetin e transportit ujor të Lumit Xijiang me Gjirin Beibu dhe mund të presë anije me kapacitet deri në 5000 tonë.
Si një pjesë kyçe e Korridorit të Ri Ndërkombëtar të Tregtisë Tokë-Det, kanali ofron një rrugë më të drejtpërdrejtë nga rajonet e brendshme të Kinës drejt detit dhe më tej drejt tregjeve të ASEAN-it.
Një rrugë më e shkurtër drejt detit
Për rajonin jugperëndimor të Kinës, transporti i mallrave të destinuara për tregjet ndërkombëtare, është mbështetur tradicionalisht tek rrugët që kalojnë përmes porteve bregdetare lindore dhe jugore të vendit.
Kanali Pinglu do ta shkurtojë distancën tradicionale të transportit detar midis Kinës Jugperëndimore dhe tregjeve të Azisë Juglindore me mbi 560 kilometra, duke ulur 18-30% kosto logjistike prej 5.2 miliardë juanësh (rreth 775 milionë dollarë) në vit, njoftoi Grupi Mediatik i Kinës (CMG).
Ndikimi mund të jetë veçanërisht i rëndësishëm për mallrat kryesore, duke përfshirë mineralet, qymyrin, drithërat dhe materialet e ndërtimit, ku kostot e transportit zënë një pjesë relativisht të madhe të kostove totale.
Kanali do të forcojë gjithashtu rolin e Gjirit Beibu si një portë detare për provincat e brendshme të Kinës. Mallrat nga rajoni jugperëndimor mund të arrijnë në tregjet e Azisë Juglindore përmes Gjirit Beibu, pa pasur nevojë të udhëtojnë fillimisht drejt lindjes, në portet e provincës Guangdong.
Foto nga VCG
Forcimi i një korridori tregtar ekzistues
Kanali Pinglu është pjesë e Korridorit të Ri Ndërkombëtar të Tregtisë Tokë-Det, një rrjet logjistik që lidh Kinën Perëndimore me Azinë Juglindore përmes hekurudhave, rrugëve tokësore, ujore dhe porteve. Kanali shton një lidhje ujore në korridor, duke lidhur sistemin lumor të brendshëm të Kinës me portet dhe rrugët detare të Gjirit Beibu.
Korridori është shndërruar tashmë në një rrugë të rëndësishme për tregtinë midis Kinës Perëndimore dhe ASEAN-it, raportoi gazeta singaporiane “Lianhe Zaobao”. Deri në fund të nëntorit të vitit të kaluar, përmes korridorit ishin transportuar më shumë se 5 milionë kontejnerë (TEU). Kanali pritet të forcojë lidhjen midis pikave të nisjes në brendësi të vendit dhe portës detare të korridorit në Guangxi. Ndërkohë, kanali mund të shtojë rreth 3.5 milionë tonë vëllim ngarkesa pas hapjes dhe potencialisht të arrijë në 150 milionë tonë në vit, në një perspektivë afatgjatë.
Zhvillimi në kohën e zgjerimit të vazhdueshëm të tregtisë midis Kinës dhe ASEAN
Kina dhe ASEAN kanë qenë partnerët më të mëdhenj tregtarë të njëri-tjetrit për gjashtë vite radhazi. Në gjysmën e parë të këtij viti, tregtia dypalëshe arriti në 4.34 trilionë juanë, një rritje prej 18.2% krahasuar me vitin e kaluar, sipas Administratës së Përgjithshme të Doganave të Kinës. Porti i Gjirit Beibu po zgjerohet gjithashtu me shpejtësi. Vëllimi i tij i trajtimit të kontejnerëve arriti në rreth 10 milionë TEU në vitin 2025, krahasuar me 2.28 milionë që ishte në vitin 2017.
Foto nga VCG
Kombinimi i një porti në rritje dhe një rruge të re ujore të brendshme, mund të rrisë më tej vëllimin e mallrave që qarkullojnë midis Kinës Perëndimore dhe Azisë Juglindore.
Implikimet për zinxhirët e furnizimit
Kanali mund të mbështesë gjithashtu lidhje më të ngushta midis bazës prodhuese të Kinës dhe rrjeteve prodhuese në zgjerim të Azisë Juglindore.
Kompanitë kineze i kanë zgjeruar gjithnjë e më shumë operacionet prodhuese në Azinë Juglindore, ndërsa ekonomitë e ASEAN-it janë bërë destinacione të rëndësishme për investimet dhe prodhimin kinez.
Priyanka Kishore, kryeekonomiste dhe drejtore e kompanisë “Asia Decoded” me bazë në Singapor, vuri në dukje se ky zhvillim mund të forcojë pozicionin e ASEAN-it në zinxhirët globalë të furnizimit, duke mbështetur rolin e rajonit si një qendër prodhimi me kosto ekonomike.
Vlerësimi i saj tregon për një rol tjetër të mundshëm të kanalit: lehtësimin e lëvizjes së lëndëve të para, komponentëve dhe produkteve të gatshme midis Kinës Jugperëndimore dhe Azisë Juglindore.
Foto nga VCG
Për eksportuesit e ASEAN-it, kanali mund të përmirësojë gjithashtu aksesin në tregjet e brendshme të Kinës.
Produktet bujqësore dhe mineralet mund të transportohen drejt veriut përmes Gjirit Beibu, ndërsa mallrat e prodhuara në Kinë – përfshirë produktet e konsumit dhe pajisjet industriale – mund të transportohen drejt jugut, për në tregjet e Azisë Juglindore.
