Bijar Rahimi, një ish-banor i kampit të Manzës që sapo ka dalë nga aty tregoi në një intervistë për Euronews Albania historinë se si u largua nga aty, pavarësisht sa e vështirë ishte.
Ai tha se kishte arritur t’i shpëtonte dhe spiunit kur kishte dalë kinse për të blerë diçka dhe nuk ishte kthyer më kurrë.
“Kam ardhur me vizë për të blerë në Tiranë gjëra, mora vendimin që të largohem, u largova nga ekipi që kisha në ruajtje, u arratisa nga ai ekip pastaj shkova te familja e Sarfarazit. S’është e thjeshtë. Për të kërkuar një leje që të dalësh të blesh është shumë e vështirë, ama kur del jashtë mundohesh të ikësh,” – u shpreh Rahimi.
Ish-muxhahedini: MEK ta mban trurin në kontroll, gjithçka në duart e tyre
Një ish-anëtar i MEK, Sarfaraz Rahimi, tha në një intervistë për Euronews Albania se muxhahedinët ta mbajnë trurin nën kontroll dhe është e vështirë të shpëtosh prej tyre.
Siç ai tregoi gjithçka ju thoshin brenda kampit është që jashtë nuk do ishin askushi, ndërsa brenda kampit përdorej një ideologji e tillë që qartazi truri yt ishte në duart e tyre dhe mund të përdorej siç donin.
“Ne në MEK jetonim sipas rregullave dhe një disipline ushtarake që ata na vendosnin, le të themi që kemi qenë si robotë. Çoheshim në mëngjes me një urdhër dhe çdo punë që bënim më pas vazhdonte po me urdhra. Edhe vetë unë kam qëndruar 21 vite në MEK.
Ne nga bota e internetit s’dinim, nuk e dinim çfarë ishte interneti. Ne nuk dinim si përdorej telefoni, por më e rëndësishmja s’na kishte ngelur asnjë ndjesi nga ato të familjes. Edhe unë dhe im vëlla kur ishim në MEK, në Irak e kemi marrë vesh në mënyra të ndryshme që prindërit tanë kishin vdekur. Nëse doni të dini a është e vështirë apo e lehtë të largohesh nga MEK-u, është shumë e vështirë, s’ka asgjë të lehtë aty. Na thoshin që nëse dalim nga MEK s’jemi të pranuar në shoqëri, s’do na mbështeste askush, do ishim njerëz që s’do kishim asgjë, madje dhe ne që kishim dalë nga MEK-u, atyre që ishin brenda u thoshin që ne kemi përfunduar duke mbledhur plehra,” – u shpreh Rahimi./m.j
