Është shtyrë seanca e parë në Gjykatën e Lartë lidhur me padinë për shpifje të Ministrit të Punëve të Brendshme Saimir Tahiri për kreun e grupit parlamentar të Partisë Demokratike Edi Paloka.
Shkak është bërë mungesa e Palokës në sallën e gjyqit. Pas daljes nga Gjykata e Lartë, ministri Tahiri u shpreh dyshues për pretendimin e Palokës se nuk kishte marrë njoftim për zhvillimin e seancës.
Ministri tha se përmes padisë synon t’i japë mundësi deputetit Paloka që të vërtetojë akuzat e ngritura ndaj tij se ka lidhje me botën e krimit, e konkretisht me Emiljano Shullazin. Tahiri u shpreh se nuk ka asnjë mundësi pajtimi mes tij e Palokës.
“Sot Paloka nuk u paraqit me pretekstin se nuk ka marrë njoftim. Unë po pritem ta besoj. Shpresoj që seancën tjetër të marrë njoftim të gjejë kuroja dhe të vërtetojë akuzat ndaj meje. Në të kundërt ka detyrimin të pranojë përgjegjësinë për shpifjet që ka bërë ndaj meje. Duhet të vëmë një standard për drejtësinë, qytetarët nuk pretendojnë që drejtësia të ketë dy standarde, një për të varfërit që dënohen, një për të pasurit të pushtetshmit që nuk dënohen po taksohen apo amnistohen. Ky është një standard që nuk mund ta pranoj. Kam shumë dëshirë të investoj besim tek sistemi i drejtësisë, ndonëse provat që ka dhënë në vazhdimësi lë vend për të dekurajuar. Por unë besoj se nëse bëhemi bashkë ja dalim ta detyrojmë drejtësinë të japë vendime të drejta për qytetarët pa dallim. Unë jam dënuar nga fëmijët e Berishës kur kam qenë në opozitë. edhe në opozitë kam kontribuar për sistemin e drejtësisë. Sot është dita që ata tregojnë se janë të përgjegjshëm si qytetarë për të treguar se sistemi funksionin”, u shpreh ministri
