Tanja Fajon është një prej zyrtarëve të lartë të institucioneve të BE’së që mbështet Shqipërinë dhe Ballkanin në përgjithësi për integrim në BE.
Duke folur për mediat serbe, raportuesja për Kosovën në Parlamentin Europian thotë që qëndrimet e Presidentit francez, Emmanuel Macron për zgjerimin duhen të jenë në pajtim me ato të BE’së
“…shpresojmë se Franca do të zbutet dhe në çështjen e Shqipërisë”,tha Fajon, e cila i është kundërvënë mesazheve të ftohta të Presidentit Macron gjatë Samitit të Sofjes.
Fajon, deputete nga Sllovenia, ka thënë se paqja dhe stabiliteti i Ballkanit Perëndimor janë arsye përse zgjerimi është me rëndësi për të gjithë Europën.
“Franca, megjithatë, nuk është i vetmi vend. Ka edhe vende të tjera që kanë interesa të mëdha”, thotë Fajon.
Ajo thotë se është optimiste dhe shpreson që në qershor vendet anëtare të BE do të miratojnë hapjen e negociatave për pranimin e Maqedonisë dhe Shqipërisë, ku sipas saj, do të ishte një hap pozitiv për të gjithë procesin e zgjerimit.
“Ka ende disa vende të Ballkanit Perëndimor që kanë probleme me korrupsionin dhe krimin e organizuar, demokracisë dhe lirisë së mediave”, thotë Fajon, duke shtuar që është pozitive që Ballkani Perëndimor pas një kohë të gjatë përsëri e ka fokusin e BE-së.
Fajon tha se takimi i nivelit të lartë në Sofje dha mesazh “ndoshta jo shumë ambicioz” por “të qartë” të perspektivës evropiane të Ballkanit Perëndimor.
a.ç
