Vala e temperaturave të larta gjatë ditëve të fundit ka sjellë një rritje të numrit të qytetarëve që i janë drejtuar shërbimeve mjekësore.
Një pjesë e konsiderueshme e tyre kanë paraqitur shqetësime gastrointestinale, të shkaktuara nga konsumimi i ushqimeve të kontaminuara në restorante dhe lokale të zonave bregdetare ku po kalojnë pushimet.
Sipas Skënder Bratajt, Drejtorit të Qendrës Kombëtare të Urgjencave, “17.4 % e personave që janë drejtuar në qendrat verore kanë pasur probleme gastrointestinale”.
Brataj u ka kërkuar subjekteve që ofrojnë shërbime në zonat bregdetare, por edhe në pjesë të tjera të vendit, të respektojnë kushtet e ruajtjes së produkteve ushqimore. Kjo vlen veçanërisht për restorantet dhe subjektet që tregtojnë mish e peshk.
“Ka shumë rëndësi zinxhiri ftohës. Pasi toksinat shtohen shumë shpejt në këto temperatura. Brenda 1-3 orë fillojnë të vjellat”, shprehet ai.
Në rastet e helmimit ushqimor, mjeku thekson se marrja e lëngjeve dhe rehidratimi janë thelbësore.
“Nga të vjellat e diarreja, humbim elektrolitet, të cilat duhen zëvendësuar, pasi dehidratimi shkakton pasoja të rënda në organizëm”, thekson Brataj.
Kujdes për ruajtjen e ushqimeve duhet të tregojnë edhe amvisat në shtëpi, veçanërisht kur përdorin produkte të ngrira ose ushqime që duhet të mbahen në një temperaturë të përcaktuar.
