Zv. Ministrja e Shëndetësisë, Mira Rakacolli, shpjegoi me detaje të premten mbrëma rolin e Komitetit të Ekspertëve, por edhe situatën e krijuar së fundmi me infektimet gjithnjë e në shtim në vendin tonë. E ftuar në emisionin “Java në RTSH”, Rakacolli tha se Komiteti i Ekspertëve përpiqet të bëjë më të mirën, por nuk mund t’i dijë të gjitha. Ajo theksoi se struktura në fjalë është në komunikim të përditshëm me kolegët e huaj për të shkëmbyer përvoja.
Sa i përket masave shtrënguese dhe vendosjes së maskës me detyrim, zv.ministrja tha:
“Është e domosdoshme që të gjithë të vendosim maskat mbrojtëse dhe të zbatojmë rregullat për parandalimin e pandemisë. Politika duhet të jetë në shërbim real të shëndetit të njerëzve dhe jo të abuzojë me situatën” – tha Rakacolli.
Ajo solli edhe një detaj interesant duke u shprehur se ndryshe nga vendet e tjera, në Shqipëri nuk ka pasur përhapje të virusit në shtëpitë e të moshuarve.
Ndërsa duke komentuar situatën dhe infektimet e larta ditore, Rakacolli u shpreh:
“Mund të themi se jemi pranë vijës së kuqe nëse vijojmë të kemi rritje të rasteve të infektimeve. Ai që bën testimin për virusin duhet patjetër të vetëkarantinohet. Izolimi është shumë i rëndësishëm. Një nga skenarët për përballimin e pandemisë është rritja e numrit të testimeve për rastet e dyshuar. Gjatë muajve të verës përveç punës për hapjen e spitaleve Covid, ka vijuar edhe trajnimi i stafeve mjekësore” – tha zv.ministrja në studion e “Java në RTSH”.
Rakacolli theksoi se mjekët tanë po përballen me një pandemi që ndodh një herë në 100 vite.
“Qytetarët nuk duhet të shtrojnë pyetjen se kur do të kemi mbyllje, por duhet të pyesin se çfarë duhet të bëjmë për të mos u infektuar” – tha ajo.
Për më tepër, ndiqni intervistën e plotë:
