Mes përplasjeve me tre media të mëdha amerikane, Shtëpia e Bardhë prezantoi “Trump TV”. Bëhet fjalë për një platformë transmetimi 24-orëshe, kushtuar aktiviteteve të administratës amerikane.
Vendimi vjen pasi presidenti Trump u revokoi akreditimet e shtypit gazetarëve të rrjeteve televizive CNN dhe MS NOW dhe faqes së lajmeve Politico.
Sipas Shtëpisë së Bardhë, platforma e re do të ofrojë transmetim 24-orësh në 7 ditë të javës me përditësime në kohë reale të videove më të mira, fjalimeve kryesore dhe momenteve më të rëndësishme që nuk duhen humbur si dhe të rejat më të fundit e më të rëndësishme nga administrata.
“Jo çdo moment i rëndësishëm ka arritur tek publiku, tani kjo është e mundur përmes platformës”- thuhet në njoftimin e saj. Duke i akuzuar mediat e mëdha amerikane për raportim të lajmeve të rreme rreth administratës së tij, disa ditë më parë Trump ua ndaloi aksesin gazetarëve të CNN, MS NOW dhe Politico.
Të hënën tre mediat paditën në gjykatë administratën Trump, duke argumentuar se kufizimi i aksesit cenon të drejtat e tyre kushtetuese, përfshirë lirinë e shtypit të garantuar nga Amendamenti i Parë i Kushtetutës amerikane.
Në deklaratën e përbashkët, ato thanë se qeveria nuk duhet të përcaktojë se çfarë raporton apo çfarë publikojnë mediat.
Në mbështetje të tyre, rrjetet kryesore televizive amerikane, përfshirë New York Times dhe Washington Post, pezulluan mbulimin e aktiviteteve të përbashkëta Presidentit Donald Trump.
