Politika bullgare është përfshirë në një skandal që deri tani ka sjellë dorëheqjen e një sërë zyrtarëve të lartë, përfshirë ministra dhe zëvendësministra. Skandali që shpërtheu në fund të javës së kaluar, kur u zbulua se kompania e ndërtimit “Artex” po u shiste deputetëve, ministrave dhe zëvendësministrave të qeverisë së koalicionit të qendrës së djathtë, apartamente luksoze në zonën Iztok të Sofjes, me çmime shumë më të ulëta se ato të tregut.
Zëvendësministri i Energjisë, Krasimir Parvanov, ishte i fundit në radhë që dha dorëheqjen. Të shtunën e kaluar, ministrja e Drejtësisë, Ceska Caceva dha dorëheqjen ashtu si zëvendësministrja e Sporteve, Vania Koleva.
Sipas Prokurorit Publik dhe Komisionit për Luftën kundër Korrupsionit në këtë skandal është përfshirë dhe Cvetan Cvetanov, “krahu i djathtë” i kryeministrit Bojko Borisov dhe udhëheqësi i grupit parlamentar të partisë Gerb dhe njëherësh nënkryetar i partisë.
Nën hetim është vendosur nga autoritetet edhe kompania “Artex”. Mediet e Sofjes theksojnë se kryeministri Borisov do të kërkojë largimin e Cvetanov-it nga detyra.
Analistët parashikojnë se lista e politikanëve të përfshirë nuk do të ndalet me kaq. Gazeta ditore “Ora” kujton se në vitin 2017 kjo shumicë parlamentare kishte votuar amendamentet e ligjit për rregullat e ndërtimit, të cilat autorizuan kompaninë “Artex” të vazhdonte ndërtimin e një objekti prej 34 katesh në zonë rezidenciale Lozenets të Sofjes, pavarësisht se leja e ndërtimit kishte skaduar.
g.kosovari
