Gratë shtatëzëna nuk janë imune ndaj Covid-19 sikundër çdo person tjetër që kontaminohet dhe mund të përjetojë forma të ndyshme të virusit; nga simptoma të lehta tek ato klinike më të rënda. Situata delikate në rastin e grave shtatzëna ku janë bazuar studimet në të gjithë botën është fakti nëse ato e transmetojnë ose jo virusin tek foshnja që mund të komplikonte shëndetin si të nënës po ashtu edhe të foshnjes.
Organizata Botërore e Shëndetësisë thotë se gratë shtatëzëna mund të preken rëndë nga Covid-19 dhe kjo mund të sjellë probleme serioze në shëndetin e tyre apo të fëmijës.
Në lidhje me faktin nëse virusi transmetohet nga nëna tek fëmija, përfundimet janë ende të ndara në dy grupime: gratë shtatzëna të infektuara që kanë humbur foshnjën e tyre për shkak të komplikacioneve që i atribuohen Covid-19 dhe të tjera që kanë transmetuar antitrupa dhe jo virus tek fëmijët e sapolindur. Studimet janë njësoj në një pikë; që antitrupat SARS-CoV-2 nuk janë jetëgjatë, pra me rritjen e foshnjes ulet dhe numri i antitrupave. Lidhur me këtë problematikë të ndjeshme, UNFPA, Agjencia e Kombeve të Bashkuara në Shqipëri po monitoron nga afër dhe po punon me partnerët për të adresuar jo vetëm problematika por edhe për të ndihmuar gratë shtatzëna të marrin shërbimin e nevojshëm sipas protokollit, në përpjekje për të garantuar shëndetin e gruas dhe foshnjes.
UNFPA në Shqipëri ndjek hap pas hapi ecurinë dinamike te situatës së infeksioneve me qëllim që gratë shtatëzana, që edhe për shkak të ndryshimeve fizike kanë vështirësi në frymëmarrje, të marrin shërbimet shëndetësore me përparësi për shkak se janë më të predispozuara për të pësuar forma më të ashpra të Covid-19.
UNFPA apelon gratë shtatzëna se duhet të tregojnë kujdes si gjithë të tjerët duke vendosur barriera mbrojtëse si maskë, si edhe duke mbajtur distancën dhe higjienën.
Gjithashtu me rëndësi është mënyra e trajtimit me protokoll më specifik për të mos prekur foshnjen.
UNFPA Albania bashkë me ekspertët sugjerojnë që gratë që ushqejnë foshnjet me gji nuk duhet të ndahen nga të porsalindurit e tyre, pasi nuk ka prova që tregojnë se virusi SARS-CoV-2 mund të transmetohet përmes qumështit të gjirit nga nëna tek foshnjat, duke rekomanduar vazhdimin e trajtimit në këtë mënyrë.
Në Shqipëri ka patur raportime në media për një grua shtatzënë dhe një tjetër lehonë që fatkeqësisht kanë humbur jetën për shkak të komplikacioneve nga Covid19. Përsa i takon situatës pandemike në vendin tonë janë kryer 368.733 testime nga ku janë shënuar 81.993 raste pozitive gjithësej . Nga këto statistika, 49.543 janë shëruar dhe 1418 fatkeqësisht kanë humbur jetën.
