Orët po kalojnë dhe shpresat për të gjetur jetë nën rrënojat që la pas tërmeti i 30 tetorit në Izmir po shuhen. Melek Taşkin Taşol kryetare e shoqatës “Shqiptarët e Bornovës” në Turqi ka treguar për abcnews.al momentin e parë kur dëgjoi lëkundjet e tërmetit të fuqishëm me epiqendër në detin Egje. Ajo thotë se ndodhej në punë në ato momente dhe gjëja e parë që mendoi ishte se ky qe fundi. Tashmë, thotë ajo, kanë frikë të qëndrojnë në banesat e tyre të cilat kanë pësuar dëmtime të forta.
“Unë po punoja në vendin tim të punës ditën e tërmetit, u trembëm shumë dhe kishim shumë frikë se ishin shembur disa pjesë të mureve të vendit tonë të punës. Unë qëndrova në pragun e derës dhe prisja të kalonte tërmeti, por zgjati aq shumë dhe ato sekonda nuk kaluan lehtë. Mendova se gjithçka kishte mbaruar, ne jemi ende të prekur dhe nuk mund të flemë në shtëpitë tona”, shprehet ajo.
Taşol shprehet se përveç 3 shqiptarëve që humbën jetën nga tërmeti, një tjetër mori dëmtime të rënda, ndërsa tregon se janë në kontakt të vazhdueshëm me bashkëkombasit e tjerë në këtë zonë. Ajo thotë se shoqata ndodhet 2 km larg epiqendrës së tërmetit dhe shumë shpesh shkojnë pranë miqve të tyre për të vazhduar kërkimet për të afërmit e zhdukur.
“Për fat të mirë për mua dhe të afërmit e mi, situata është e mirë, por ne humbëm 3 shqiptarë nga tërmeti, një prej të cilëve ishte anëtar i shoqatës sonë. Dhe 1 person u plagos, ne jemi në kontakt të vazhdueshëm me të në spital dhe me shqiptarët e tjerë që pësuan dëme nga tërmeti.
Ne shpesh shkojmë në zonën e rrënojave, 2 km larg nga shoqata jonë, njerëzit atje janë ende në një gjendje shumë të keqe. Ka ende nga ata që po presin që të afërmit e tyre të dalin nga rrënojat, shpresat po mbarojnë ndërsa orët kalojnë, ata qëndrojnë në parqe në një mot të ftohtë, shteti ynë, komunat tona, organizatat tona joqeveritare dhe qytetarët të gjithë po ndihmojnë në këtë situatë. Shpresojmë që Allahu të mos lejojë askënd të jetojë përsëri, ka shumë ndërtesa të dëmtuara rreth ndërtesave të shembura dhe atyre njerëzve u ndalohet të hyjnë në këto ndërtesa po qëndrojnë jashtë në çadra”, tregon ajo.
Aktualisht numri i viktimave nga tërmeti ka shkuar në 91, ndërsa 994 persona janë plagosur dhe po marrin trajtim mjekësor. Tërmeti shkaktoi dëme të mëdha në Izmir dhe në ishullin grek “Samos”. /d.c
Shqiptarja tregon tmerrin që pa nga tërmetin në Turqi: Mendova se mbaroi çdo gjë, nuk kemi shumë shpresa për të nxjerrë të gjallë nga rrënojat
