Një 42-vjeçar shqiptar me banim në Sanremo të Italisë është arrestuar nga policia lokale pasi është kapur në zotërim të 83 kilogramëve marijuanë.
Lënda narkotike ishte fshehur në kantinën e shtëpisë së Arian Bashmetës dhe vlera që do të kapte në tregun e jetës së natës të qytetit ishte rreth 100 mijë euro.
Agjentët kanë zbuluar se Bashmeta kishte përdorur deodorant për të mbuluar erën e fortë që vinte nga marijuana, për të mos rënë në sy të fqinjëve të pallatit të tij.
I dëbuar dhe i riatdhesuar në Shqipëri në vitin 2015, Bashmeta kishte hyrë sërish në mënyrë klandestine në territorin italian një vit më vonë shkruan TCH. Ai ishte gjurmuar në Breshia, ku ishte arrestuar për shkelje të rregullit për dëbimin, por nuk i ishte nënshtruar një ndëshkimi.
Duke përfituar nga pozita e bashkëshortes, me dokumenta të rregullta, ai ishte kthyer në Sanremo për t’u rikthyer në xhiron e shpërndarjes së narkotikëve.
Në banesën e tij policia ka gjetur pajisje për paketimin e drogës dhe parave, si dhe substanca përzierëse./a.m.
