Një shqiptar ka telefonuar policinë britanike për ta ndihmuar që të dalë nga situata ku ndodhet, pasi sipas tij ishte nën presion nga një grup trafikantësh.
Për Muhamet Halilin gjithçka nisi vitin e kaluar, kur teksa ishte duke drejtuar një ‘Mercedes’ në rrugën Cardiff të Barry-t përplasi një person me motor duke e hedhur në anën tjetër të rrugës e duke i shkaktuar plagë të shumta.
Halili tha në atë kohë në gjykatë se ndaloi për një moment makinën por më pas i dha gaz dhe u largua me shpejtësi.
Gjykatësja vendosi që 36-vjeçari shqiptar të lihej i lirë me unazë gjurmuese në këmbë, teksa hetimi për aksidentin po vijonte. Por 6 muaj më pas, ai telefonoi policinë britanike duke i kërkuar ta shpëtonin pasi disa persona në banesë po kërkonin ta lëndonin. Pasi arritën në adresë, policia gjeti jo vetëm Halilin, por edhe ambientet e banesës të përshtatura për kultivimin e kanabisit.
Ai u dërgua sërish në gjykatë, por u shpall i pafajshëm për akuzat e kultivimit të drogës, pasi deklaroi se po detyrohej nga një bandë shqiptarësh të cilëve u kishte marrë rreth 30 mijë paund borxh disa kohë më parë.
Ai gjithashtu tha në gjykatë se “çunat” shqiptarë ia kishin hequr unazën e gjurmueshme nga këmba, duke e detyruar më pas të punonte në “shtëpinë e barit”.
Halili i tha gjykatëses se edhe gjatë aksidentit, nuk ndaloi për shkak se në makinë ndodhej me një gangster shqiptar, trafikant ndërkombëtar droge, për të cilin shërbente si shofer.
a/r
