Donin të prezantohesin si punonjës të një kompanie që bën furnizimin me gaz nëpër banesa, por e moshuara është treguar e zgjuar, edhe pse pa ditur gjë. I ka telefonuar të bijës dhe i ka thënë se po firmoste një kontratë të re për gazin në shtëpi.
Pa menduar se dy burrat që kishte përballë donin ta mashtronin.
27-vjeçari Angelo Maurici dhe 45-vjeçari shqiptar Altin Verushi, të dy banues në Genova janë vënë në prangat e policisë pasi akuzohen për tentativë vjedhjeje.
“Këtu janë dy burra që bëjnë furnizimimin me gaz, po më ofrojnë një kontratë”, këto ishin fjalët e 88-vjeçares në telefon me vajzën e saj, ku kjo e fundit ka lajmëruar policinë dhe ka kërkuar ndihmën e tyre pasi kishte dyshuar se mund të kishte ndonjë mashtrim.
Kur patrulla mbërriti në banesën e të moshuarës, gjetën dy burrat ende brenda banesës, e në dhomën e gjumit ku gruaja pensioniste mbante sendet me vlerë, sirtaret ishin të gjitha të hapura dhe të kontrolluara.
Ngjarja ndodhi sot rreth orës 12, ku dy mashtruesit, i kishin ofruar të moshuarës për të nënshkruar një kontratë të re për furnizimin me gaz dhe me këtë justifikim ata e kishin bindur që t’i linte të hynin në shtëpi.
E moshuara, kur policia mbërriti në banesë ishte duke bërë kafe për ta, e nuk kishte dyshuar për asgjë, por për fat të mirë kishte bërë telefonatën tek e bija e cila ishte alarmuar.
Efektivët konfiskuan një Audi A4 me të cilën ata mbërritën në Savona, disa dokumente dhe kontratat që ata pretendonin se ishin të sakta.
