52,4% e vdekjeve të shqiptarëve vijnë nga sëmundjet e zemrës. Sipas institutit të statistikave, ato lidhen me sëmundjet kronike kardiake, ato të enëve të trurit dhe ishemitë e zemrës.
Rritja e vdekshmërisë, sipas mjekëve është ndikuar edhe nga pasojat që Covid shkaktoi në shëndetin e përgjithshëm të popullatës. Gjatë kohës së pandemisë shumë persona anashkaluan mjekimin për shkak të frikës, duke rënduar gjendjen shëndetësore.
Përveç gripit, këto ditë spitalet janë tejmbushur edhe me të sëmurë kardiake apo me sëmundje të tjera kronike. Për ekspertët e shëndetit stina e dimrit është armiku i pacientëve, që vuajnë nga zemra.
Pacientët, që vuajnë nga sëmundjet kardiake, duhet patjetër të marrin një mjekim më të shtuar gjatë kësaj periudhe.
Kërcënuesit kryesorë në përhapjen e këtyre sëmundjeve janë alkooli dhe duhani, që ndikojnë direkt në funksionimin e zemrës. Por edhe mungesa e veprimtarive sportive si dhe një jete sedentare e shton mundësinë e të prekurit nga problemet e zemrës.
