Shqipëria vendos rekord të ri historik për numrin e turistëve të huaj që e kanë vizituar gjatë 2025-ës.
Rreth 12.5 milionë turistë të huaj kanë hyrë në territorin e Shqipërisë përgjatë vitit 2025. Në krahasim me vitin 2024, shifrat janë në rritje me 6.6% ose rreth 770 mijë turistë më shumë.
Shifrat për të dhënat e turizmit për vitin 2025 i ka bërë publike ministri i Turizmit, Blendi Gonxhja. Sipas ministrit, këto të dhëna dëshmojnë jo vetëm rritjen e interesit për Shqipërinë si destinacion, por edhe përmirësimin gradual të standardeve, shërbimeve dhe ofertës kulturore në të gjithë territorin.
Të dhënat tregojnë se edhe për vitin 2025 rekordin e mbajnë vizitorët nga Kosova, me mbi 4.6 milionë vizitorë, ose thënë ndryshe, numri i tyre ka ardhur në rritje me 5.3% në krahasim me vitin e shkuar.
Të dytët renditen vizitorët nga Italia. Edhe për 2025, italianët renditen pas qytetarëve nga Kosova, me rreth 1.3 milionë vizitorë, por me një rritje më të lehtë se viti 2024, vetëm 3.3%.
Sipas të dhënave, pesha e vizitorëve nga vendet e Bashkimit Europian ka ardhur në rritje, pasi veç italianëve, në rritje janë edhe turistët nga Anglia, të cilët po i afrohen gati 1 milion turistëve. Më pas renditen holandezët me më shumë se 800 mijë vizitorë, 781 mijë turistë janë me origjinë nga Franca, ndërsa nga Gjermania janë më shumë se 450 mijë.
Po ashtu, në rritje janë edhe turistët përtej Atlantikut. Sipas të dhënave zyrtare, numri i turistëve nga Shtetet e Bashkuara është rritur me 8.7% në krahasim me 2024, duke arritur në një total prej 241 mijë vizitorë, ndërsa turistët nga Kanadaja janë rritur me 11.9%, duke arritur në 44 mijë turistë.
Ky numër në rritje i turistëve, sipas Ministrit Gonxhja, është edhe një përgjegjësi e shtuar për planifikim më të kujdesshëm dhe menaxhim të qëndrueshëm.
