Ministrja për Europën dhe Punët e Jashtme Elisa Spiropali ka publikuar një fotoalbum nga vizita e saj zyrtare disa-ditore në Kiev, ku u dekorua me “Urdhrin e Princeshë Ollgës“ nga presidenti ukrainas Volodymyr Zelensky.
Gjatë kësaj vizite, Spiropali shprehet se ka parë nga afër lodhjen në trupat dhe shpirtrat e njerëzve atje.
“Rrëfim i javës në imazhe.
Në Kievin që përballet çdo ditë me sulme barbare në mesin e këtij dimri të egër, gjatë vizitës sime zyrtare në Ukrainë pashë nga afër lodhjen në trupat dhe shpirtrat e njerëzve. Pashë fytyra luftëtarësh që mbajnë plagë të dukshme e të padukshme. Familje që jetojnë me mungesa. Prindër që jetojnë me frikën e çdo dite. Fëmijë që rriten më shpejt se mosha e tyre.
Brenda kësaj dhimbjeje dhe qëndrese të paepur, u nderova nga Presidenti Volodymyr Zelensky me Urdhrin e Lartë të Princeshës Olga, Klasi I.”, shkruan Spiropali krahas fotove.
Ndërkohë, lidhur me dekorimin, ministrja shprehet se përveç nderimit, ky titull i ka shtuar asaj përgjegjësinë.
“Ky nder dhe kujtim i paharrueshëm, ma shtojnë përulësinë dhe përgjegjësinë. Për të folur, për të vepruar dhe për të qëndruar çdo ditë në shërbim të vendit tim dhe të vlerave që na bashkojnë.”, shton ministrja.
Zyrtarët ukrainas gjatë kësaj vizite e falenderuan Spiropalin për qëndrimet e saj dhe të qeverisë shqiptare në krah të sakrificës së Ukrainës, duke theksuar se mbështetja e vendeve mike si Shqipëria për të drejtën e Ukrainës, do të thotë shumë në këto kohë sfiduese.
