“Francë-Shqipëri është një ndeshje shumë e rëndësishme për të dyja skuadrat. Secila e ka përfunduar ndeshjen e parë me shije frustrimi. Lojtarët e Shqipërisë besojnë se mund të kishin arritur rezultat më të mirë me Zvicrën po të kishin qenë 11 në fushë. Francezët po ashtu mendojnë se nuk u treguan aspak në lartësinë e duhur kundër Rumanisë, që mezi e mundën me një gol në fund të ndeshjes”, shprehet Genc Burimi për “Shekulli Online”. Ai thotë se të dyja ekipet do të hyjnë në stadiumin e Marsejës me bindjen se vlejnë më shumë. Ndërsa Genc Tukiçi thotë se, Kombëtarja e Shqipërisë “duhet të luajë, jo vetëm taktikisht dhe teknikisht shkëlqyer, por edhe me shpirt dhe zemër”. “Ata janë tashmë…por nesër , më shumë se kurrë, duhet të transformohen ne artistë të vërtetë”, thotë Tukiçi.
Ndërkohë për gazetarin Burimi, “Franca shpreson, jo vetëm të fitojë dhe të arrijë kualifikimin, por ta shkërmoqë Shqipërinë me një festival golash”. “Te shqiptarët, – thotë ai, – mbizotëron besimi se të paktën barazimin mund ta arrijmë për t’i lënë ende një shans kualifikimit”. “Si shqiptar unë uroj më shumë, fitore për kuqezinjtë. Teorikisht është e mundur, por praktikisht është një utopi. Por të paktën të shënojmë një gol, pasi kjo mund ta destabilizojë keq Francën, lojtarët e së cilës kanë dhjetëfishin e presionit mbi supe se ç’kanë tanët. Duhet të hyjmë në fushë pa asnjë kompleks. Na mungon sigurisht teknika, por e kompensojmë me një shpirt kolektiv e luftarak që pak skuadra të tjera e kanë”, shprehet Genc Burimi. Ai preferon ta mbyllë prononcimin e tij me një frëngjishte që i uron suksese Shqipërisë dhe merr “hua” fjalët e Himnit Kombëtar: “Allez l’Albanie! Kush mban fanellën e Kombëtares nuk frigohet, por lufton si një hero”. Emocionet duket se mbizotërojnë edhe pianistin Tukiçi për ndeshjen Francë-Shqipëri. “Do të jetë emocion shumë i veçantë për mua të përjetoj ndeshjen Shqipëri-Francë. Natyrisht, shumë respekt dhe admirim për Francën, por përulje dhe gjithë dashninë e zemrës për Shqipërinë”, shprehet Tukiçi.
Franca dhe Shqipëria do të jenë përballë të mërkurën në orën 21:00 në ndeshjen e dytë të grupit A të Kampionatit Europian.
