Prokurori i SPAK Adnan Xholi në konferencë të përbashkët me kreun e këtij institucioni Arben Kraja kanë dhënë sot detaje sa i takon operacionit të djeshëm anti-drogë në Frakull të Fierit.
I pyetur nga gazetari i Tv Klan, Spartak Koka, nëse një nga financuesit shqiptar të kësaj sasie droge mund të jetë rezident sot në Dubai, Xholi theksoi se një nga të arrestuarit rezulton me vendbanim në Shqipëri.
Prokurori shtoi se çështja është regjistruar si formë e bashkëpunimit kriminal dhe ende nuk dihet nëse të arrestuarit kanë lidhje me grupe të strukturuara kriminale në vendet e tjera të rajonit.
Gazetari Spartak Koka: Keni arritur të identifikoni financuesin, kemi të bëjmë me një financues apo një grup të strukturuar kriminal?
Prokurori Adnan Xholi: Çështja është regjistruar për grup të strukturuar kriminal, pra forma e posaçme e bashkëpunimit.
Gazetari Spartak Koka: A keni informacion nëse një nga këta financues, të jetë shtetas shqiptar sot rezident në Dubai dhe a e kontrollojnë atë dhe kanë qenë pjesë aktive e ardhjes së kësaj sasie në Shqipëri?
Prokurori Adnan Xholi: Unë jam prokuror, jo fallxhor…dhe nuk e them dot se ku mund të jenë financuesit. Ai që është në Shqipëri, po është shtetas shqiptar me banim në Shqipëri, pjesën tjetër t’ja lëmë hetimit.
Kreu i SPAK Arben Kraja: Duhet ta mirëkuptoni që çështja është në hetim.
Gazetari Spartak Koka: Nga personat e arrestuar për këtë sasi të lëndës narkotike, disa prej tyre kanë lidhje familjare me persona të dalë nga një operacion i autoriteteve italiane në vitin 2015? Dhe a kanë arritur këta shtetas në bashkëpunim me kolumbianët të ekstraktojnë ndonjë sasi kokaine te plehu kimik apo është një proces që nuk ka arritur të zhvillohet?
Kreu i SPAK Arben Kraja: Këto janë çështje që i përkasin hetimit, duhet ta mirëkuptoni situatën.
/a.r
