Edhe pse kryefjala e ditëve të fundit janë turistët italianë që kanë mbipopulluar Shqipërinë, turoperatorët shprehen se këtë vit janë të shumtë edhe vizitorët nga Azia dhe Lindja e Mesme.
“E veçanta e këtij viti lidhet me hapjen e Azisë. Lëvizja nga Azia drejt Europës ka qenë më e madhe. Në këtë kuptim, edhe Shqipëria ka përfituar në lëvizjen nga Azia. Ndërkohë, Shqipëria është futur edhe në tregun e Lindjes së Mesme nga ku ka fluturime direkte nga Dubai, Kuvajti ka pasur fluturime direkte, nga Abu Dhabi si dhe nga Arabia Saudite, madje nga dy qytete”.
Turistët e këtyre vendeve të largëta e zgjedhin vendin tonë për turizmin kulturor, malor dhe atë të aventurës.
“Këta nuk janë turistë plazhi, por janë turistë kryesisht natyre dhe qyteti. Pra vizitojnë qytetet, kjo është edhe arsyeja që edhe Tirana gjatë muajve të verës ku më përpara ka qenë e zbrazët dhe hotelet nuk kishin shitje, tani është me shumë vështirësi të gjesh dhoma, madje ata qëndrojnë në Tiranë dhe bëjnë vizita ditore në Berat, në Vlorë apo në Theth, në lumin e Shalës pra në të gjitha destinacionet ku mund të shkosh dhe të kthehesh brenda ditës”.
Pasi turistët mbërrijnë në vend, për të arritur në destinacionet përkatëse zgjedhin të marrin automjete me qira.
“Kjo ka bërë që edhe tregu i makinave me qira të ketë pësuar rritje të jashtëzakonshme në shitje gjatë këtij viti, gjatë kësaj vere“.
Sipas operatorëve turistike ulja e çmimeve të fluturimeve për shkak të shtimit të kompanive “low cost” ka ndikuar në fluksin e vizitorëve që zgjedhin të udhëtojnë me avion./f.stafa
