Shqipëria U17 humbi 1-0 në ndeshjen kundër Italisë në Ravena, në kualifikueset për kampionatin evropian të kësaj moshe. Takimi, i cili u vendos nga Merola në minutën e 62-të, u ndoq edhe nga trajneri i kombëtares, Gianni De Biasi. Nga italianët, Shqipëria shihej si rivali kryesor i grupit që ka edhe Maqedoninë e Serbinë dhe De Biasi e konfirmon.
“Ne kemi një projekt të nisur afro dy vjet më parë për një punë të bashkërenduar ndërmjet teknikut të kombëtares A dhe trajnerët e përfaqësueseve të moshave, për të përzgjedhur dhe ndjekur hap pas hapi zhvillimin e lojtarëve premtues. Tramezzani prej dy vitesh është drejtues teknik i sektorit të të rinjve dhe po bën një punë shumë të mirë në këtë drejtim. Po punojmë tek cilësia për të ngritur një strukturë të re”, tha De Biasi pas ndeshjes.
Shumica e lojtarëve të kombëtares U17 vijnë nga Anglia, Italia, Franca e Greqia, që do të thotë se e ardhmja “kuqezi” është me të vërtetë premtuese.
BW/d.i.
Shqipëria U17 mundet nga Italia, De Biasi: Kemi shumë talente premtues
