Për gati gjysmë shekulli parcela në rrugën “Fehmi Agani” në kryeqytet, shfrytëzohet si lulishte nga ndërmarrja Hortikultura.Por në dekadën e fundit, ky vend është bërë temë e nxehtë diskutimi, raporton 038 i KTV-së.
Hera e fundit kur ndodhi diçka e tillë, ishte para gati dy vjetësh, kur kryetari i Prishtinës, Shpend Ahmeti, kishte thirrur një seancë të jashtëzakonshme të Kuvendit Komunal, për t’ia ndarë këtë tokë Ambasadës së Shqipërisë. Por, përpjekja kishte dështuar në mungesë të kuorumit, pasi LDK-ja e PDK-ja nuk i ishin përgjigjur thirrjes së kryetarit për mbledhje.
Në seancat e tjera të rregullta një ide e tillë ishte kundërshtuar nga Lidhja Demokratike, e cila në gjatë qeverisjes së saj në kryeqytet, më 2007, ia kishte ndarë këtë parcelë vetes për ndërtimin e selisë. Qeverisja e atëhershme e Vetëvendosjes në kryeqytet, e cila ishte pakicë në kuvend, e kishte përdorur këtë fakt si akuzë ndaj kësaj partie.
Por, me kalimin e kohës kjo temë u harrua. Edhe pse në mandatin e dytë, ekzekutivi ka edhe shumicën në kuvend nuk është bërë ndonjë lëvizje për kërkesën e Ambasadës Shqiptare.
Përderisa kjo e fundit nuk ka dhënë asnjë përgjigje në pyetjet e televizionit, në Komunën e Prishtinës kanë thënë se shteti shqiptar, përkohësisht, ka tërhequr kërkesën.
Sipas ish-kryesuesi i Kuvendit, tani shef i asamblistëve të Lidhjes Demokratike, Halim Halimi, kërkesa e asokohshme kishte dy probleme. Pa saktësuar qëndrimin rreth lokacionit në fjalë, ai ka shtuar ata nuk janë kundër ndarjes së truallit për përfaqësinë më të lartë diplomatike të Shqipërisë në Prishtinë.
E, Adonis Tahiri, zëdhënës në Komunën e Prishtinës, thotë se janë duke pritur kërkesën e re nga Shqipëria, për t’i dhënë fund kësaj çështjeje. Por, para se kjo të ndodhë, Komuna duhet t’i bëjë zgjidhje ndërmarrjes së saj “Hortikultura”, e cila ka në shfrytëzim parcelën prej 33 akra. Vite më parë, Kuvendi i Kryeqytetit, i kishte dhënë Ambasadës Shqiptare në shfrytëzim për 99 vjet një truall prej 2000 metrash katrorë, në lagjen Sofalia.
Por, më 2016, Komuna e Prishtinës me Ambasadën Shqiptare kishin dalë me idenë që ky vend të ndërrohej dhe kësaj të fundit t’i jepej parcela në qendër të qytetit. (KTV)
