Në Shqipëri, taksitë kanë çmimet më të shtrenjta në rajonin e Ballkanit. Shifrat zyrtare që aplikojnë taksitë janë të larta, por edhe abuzimi që bëhet me klientët është edhe më i madh.
Tarifa e detyrueshme ende pa nisur lëvizjen me taksi, është 300 lekë të rinj dhe për çdo kilometër paguhet të paktën 250 lekë ose rreth 2 euro.
Tarifat rriten në rrugëtime të caktuara dhe në orët e natës.
Nga ana tjetër, ka abuzime me shifrat që paguajnë klientët kur marrin shërbimin taksi.
Kështu nëse thërret me telefon në taksi në Tiranë, për të dërguar nga sheshi “Skënderbej” deri në Kinostudio, disa të marrin 300 lekë, disa 400 lekë, e disa të tjerë 800 e 900 lekë.
Por pse ndodh kjo diferencë çmimesh?
Disa taksi edhe pse janë të licencuara, nuk aplikojnë taksimetër. Nëse e pyet paraprakisht taksistin sa kushton fjala vjen udhëtimi nga Muzeu Kombëtar deri në Kinostudio, ai të thotë 400 lekë.
Nëse nuk e pyet, shpesh ndodh ta paguash deri në 800 lekë.
Taksi të tjera janë të pajisura me taksimetër. Ato llogarisin 300 lekë vlerën fillestare plus 250 lekë për kilometër. Dhe në lumin e trafikut, të fusin edhe kosto pritjeje duke shkuar deri në 900 lekë.
Taksi të tjera, janë të palicencuara dhe pa ngjyrën karakteristike të verdhë. Ato marrin shpesh më pak, në këtë itinerar për shembull që ndoqi noa.al, 300 lekë.
Fakti që ka disa lloje shërbimi taksi, krijon vështirësi edhe për matësit ndërkombëtarë të kostos së shërbimeve dhe jetesës nëpër botë. Numbeo, pasi vëren se tarifat e shërbimit taksi në Shqipëri nuk janë edhe aq të lira në krahasim me vendet fqinje, ato të rajonit pohon pikërisht se në Shqipëri nuk zbatohet gjithmonë tarifimi me taksimetër, ndaj dhe është e vështirë që të përcaktohet një shifër e saktë, qoftë edhe mesatarisht.
Sakaq, vendet e tjera kanë tarifa më të kontrolluara dhe larg abuzimit masiv. Në Kosovë, një kilometër me shërbim taksi kushton 0.50 cent. Duke u ndjekur më pas nga Sarajeva në Bosnje – Hercegovinë që llogarit një çmim prej 0.51 cent. Edhe në Beograd një kilometër shërbim taksi kushton rreth 0.50 cent.
Në Stamboll, 1 kilometër kushton 0.59 cent kurse në Athinë i njëjti shërbim kushton 0.74 cent.
Noa/d.i.
