Shqipëria nisi fazën e dytë të projektit “Mbështetje për Reformën Administrativo-Territoriale” (STAR2). Projekt dokumenti u nënshkrua nga Ministri i Shtetit për Çështjet Vendore, z. Blendi Çuçi, dhe Përfaqësuesi i Përhershëm i PNUD-it në Shqipëri, z. Brian Williams. Aktivitetin e pershendeti edhe Zevendeskryeministri Niko Peleshi.
STAR2 eshte faza tjeter e ndihmës së përbashkët të donatorëve për qeverinë shqiptare për të çuar më tej mbështetjen për qeverisjen vendore, pas miratimit të reformës administrativo-territoriale dhe reduktimit të njësive të qeverisjes vendore në Shqipëri nga 373 njësi në 61 të tilla.
Ndërhyrjet e projektit përfshijnë mbështetjen për 61 bashkitë e reja për fuqizimin e kapaciteteve administrative dhe institucionale të administratës së këtyre bashkive, për përmirësimin e ofrimit të shërbimeve për qytetarët në nivel vendor dhe fuqizimin e qeverisjes së mirë nëpërmjet rritjes së pjesëmarrjes së qytetarëve në proceset e vendimmarrjes. Në nivel kombëtar, ndërhyrjet e projektit përfshijnë mbështetjen operative dhe logjistike për Ministrin e Shtetit për Çështjet Vendore për të bërë të mundur drejtimin dhe koordinimin e ndihmës vendase dhe të huaj në këtë drejtim. Të gjitha këto ndërhyrje do të kontribuojnë në progresin e Shqipërisë në rrugën e saj drejt anëtarësimit në Bashkimin Evropian.
Zëvëndëskryeministri Peleshi gjatë fjalës së tij, falenderoi faktorin ndërkombëtar, në radhë të parë për pozicionimin e vendosur pro kësaj reforme kaq të rëndësishme dhe sigurisht për kontributin ekonomike në të dy fazat e projektit STAR. Gjithashtu Z.Peleshi vuri theksin tek modernizimi i shërbimeve të qeverisjes lokale “Dua të ve theksin tek modernizimi i shërbimit të bashkive, edhe sepse ajo vjen paralel dhe perqaset me vizionin tonë të qeverisjes qendrore për të modernizuar shërbimet. Ne kemi dhënë një kontribut modest prej 1.5 milion euro për të modernizuar arkivat, këtij produkti do i bashkohet edhe kontributi i projektit STAR 2, për të përfunduar në kohë sa më të shpëjtë dixhitalizimin e tyre. Nuk mund të jemi të dixhitalizuar në qëndër dhe të pa dixhitalizuar ose konvencionalë në nivel lokal, është e domosdoshme që të gjitha institucionet tona të flasin me të njëjtën gjuhë. Ne nuk e shohim dixhitalizimin si një qëllim në vetvete, qoftë në nivel qëndror qoftë në nivel vendor, ne e shohim modernizimin dhe dixhitalizimin, si mjetin më të mirë për të luftuar korrupsionin në zyrat tona. Modernizimi është ajo cka lufton shkakun, përpara se të merremi pastaj me pasojat, që nuk mungojne, qoftë të korrupsionit të vogel të dritareve të errta të zyrave tona ende të pamodernizuara, qoftë të korrupsionit në nivele më të larta.” tha ai.
Ministri i Shtetit për Çështjet Vendore, z. Blendi Çuçi, theksoi: “Nëpërmjet këtij projekti synojmë që të kemi dixhitalizuar dhe modernizuar ofrimin e shërbimeve në një sportel unik, për të gjitha bashkitë, çka do të sjellë një ndryshim radikal në përmirësimin e cilësisë së ofrimit të shërbimit për qytetarët. Gjithashtu, një sfidë e madhe për bashkitë e reja mbetet forcimi i kapaciteteve të administratave vendore, sidomos në fazën e thellimit të decentralizimit. Ky projekt do të bëjë të mundur zhvillimin e një programi të gjerë trajnimi të administratës vendore”.
Drejtorja Rajonale e PNUD-it për Evropën dhe Azinë Qendrore, znj. Cihan Sultanoğlu, e pranishme në ceremoninë e nënshkrimit u shpreh: “Rritja e shkallës së kontributit, koherenca në rritje e mbështetjes së partnerëve ndërkombëtarë për projektin STAR2 janë në të njëjtën linjë me angazhimin, dhe drejtimin e vendit. Kam kënaqësinë të konstatoj se objektivat e projektit STAR2 janë harmonizuar me strategjitë e reformave të gjera në administratën publike dhe qeverisje, të cilat janë ndër kriteret kyçe politike për anëtarësimin në BE. Projekti STAR2 është kështu tani një program “umbrelle” që mirëpret kontributet e Bashkimit Evropian, duke e ditur se ky është një projekt që do të shoqërojë njësitë e qeverisjes vendore në Shqipëri drejt anëtarësimit në Bashkimin Evropian”.
STAR2 është perpiluar bashkërisht nga Qeveria e Shqipërisë dhe PNUD-i në konsultim të ngushtë me partnerët ndërkombëtarë për zhvillim, për të garantuar që ndihma të jetë në përputhje me prioritetet strategjike kombëtare, t’u përgjigjet nevojave reale dhe kërkesave të qeverisjes vendore, si dhe për të garantuar që ndihma të harmonizohet dhe të plotësojë iniciativat e tjera të donatorëve që kanë si synim fuqizimin e qeverisjes vendore. Projekti STAR2 do të zgjatë tre vjet e gjysmë dhe ka një buxhet rreth 8,2 milion dollarë. Kontributi i qeverisë shqiptare në ndarjen e kostove në këtë iniciativë është në vlerën 1.75 milion dollarë.
Gjatë eventit të nënshkrimit të projektit u firmos edhe marrëveshja ndërmjet Agjensisë Suedeze për Zhvillim Ndërkombëtar (SIDA) dhe UNDP. Ky është kontributi I parë financiar për projektin, për tu ndjekur nga partnerë të tjerë nderkombetar, të cilët janë angazhuar për ta mbështetur financiarisht STAR 2 si Bashkimi Evropian, qeveria e Zvicrës përmes Agjencisë Zvicerane për Zhvillim, nga qeveria e Italisë nëpërmjet Bashkepunimit Italian, Agjencia e Shteteve të Bashkuara për Zhvillim Ndërkombëtar (USAID) dhe Programi i Kombeve të Bashkuara për Zhvillim (PNUD).
