Departamenti amerikan i shtetit ka përditësuar nivelet e sigurisë për udhëtimin në shtetet e ndryshme nëpër botë.
Nivelet jepen në bazë të numrave, ku me notën 1 vlerësohen vendet që kanë nevojë vetëm për masa normale kujdesi, me notën 2 vlerësohen vendet ku ka nevojë për kujdes të shtuar, me notën 3 vlerësohen vendet ku duhet rimenduar udhëtimit dhe me notën 4 vendet që nuk duhet udhëtuar.
Shqipëria vlerësohet mes vendeve më të sigurta, duke marrë kështu notën 1. Në këshillat e DASH megjithatë theksohet se ka disa zona me rrezik të shtuar. E tillë është qyteza jugore e Lazaratit, për shkak të kriminalitetit.
Me këtë notë vlerësohen përgjithësisht vendet e zhvilluara, por ka edhe përjashtime nga rasti. Kështu, Franca, Gjermania, Italia dhe Mbretëria e Bashkuar vlerësohen me notën 2, për shkak të sulmeve terroriste që mund të godasin në çdo moment. Për këto vende, DASH rekomandon evitimin e grumbullimit në vende të populluara.
Në rajonin e Ballkanit Perëndimor, me notën 1 vlerësohen edhe Mali i Zi, Maqedonia dhe Serbia. Duhet kujdes megjithatë gjatë udhëtimeve në Kosovë dhe Bosnje dhe Hercegovinë, të vlerësuara me notën 2.
Për Kosovën, udhëzohet të rimendohet udhëtimi në Mitrovicën veriore, Leposaviq, Zubin Potok dhe Zveçan për shkak të konflikteve civile. Megjithatë rreziku më i madh mbetet terrorizmi, ku “grupe të caktuara vazhdimisht komplotojnë sulme të mundshme në Ballkan”.
Ndërkohë, ndër vendet që nuk këshillohet udhëtimi përfshihen ato të Lindjes së Mesme, Afrikës Veriore dhe Qendrore ku ka konflikte të armatosura, si edhe Korea e Veriut. /Scan/a.m.
