PDIU e Shpëtim Idrizit është pjesë e koalicionit “Shqipëria Madhështore” e udhëhequr nga kreu i PD-së, Sali Berisha. I ftuar në studion “Opinion” në Tv Klan ai tha se koalicioni ishte i detyruar nga Kodi Zgjedhor dhe se lajmin për futjen e 25 partive të tjera, që sipas tij nuk njihte as 90% të tyre, e mori vesh nga televizori.
Shpëtim Idrizi: Ky është një koalicion i detyruar nga Kodi Zgjedhor, ku ne në mënyrë të natyrshme kemi bërë koalicion me PD-në. Sigurisht që në koalicion ka një që e bën dhe që e udhëheq, që është PD e Sali Berishës dhe unë e kam marrë vesh nga televizioni, që Sali Berisha ka bërë koalicion edhe me 25 parti të tjera që me gjithë respektin që kam për ta, unë 90% unë nuk i njoh dhe nuk mund të jem përgjegjës për ta.
Ai u ndal edhe tek fakti që pjesë e këtij koalicioni është Vangjel Dule, e me këtë të fundit duket se Idrizi nuk i ka mbyllur “hesapet”. Pas kundërshtive që Idrizi ka me Dulen sa i takon qëndrimeve për çështjen çame, nuk pranoi kurrsesi se mund të ketë një koalicion me të. Përkundrazi ai u shpreh se ka qenë i detyruar që të ishte pjesë e koalicionit.
Shpëtim Idrizi: Unë nuk kam dhe PDIU nuk ka problem me minoritetin grek në Shqipëri, pa dyshim edhe për kauzën e tyre. Madje nëse do të shihni se si bashkëjetojnë shqiptarët e Çamërisë dhe minoriteti, shkoni në Bashkinë e Konispolit që udhëhiqet nga një çam dhe bashkëjetesa aty shkon shumë mirë. Por, që kur Vangjel Dule mohon të nderojë shqiptarët e Çamërisë apo mban qëndrime herë-herë të qarqeve ekstremiste greke, sigurisht që Shpëtim Idrizi dhe PDIU kanë gjithmonë problem. Më lini të them edhe këtë, nëse Vangjel Dule mban qëndrime të tilla për çështje çame, bëhet barrë siç është puna e censusit, varrezave dhe të tjerë. Unë mendoj që qëndrimi i tij duhet të jetë i papranueshëm jo vetëm për PDIU-në, por dhe për partitë e tjera. Unë nuk kam ndryshuar dhe as që ndryshoj qëndrim, as për Belerin dhe as për zotin Dule, kur ai do tentojë që të mohojë të drejtën e shqiptarëve të Çamërisë. Pa dyshim që unë refuzoj që të kemi probleme me minoritetin grek, përkundrazi unë jam gati të vendosem…Unë jam kundër që çdo parti shqiptare të emërojë njerëz që janë dënuar për poshtërim të shqiptarëve.
Blendi Fevziu: Po ti e ke në koalicion!
Shpëtim Idrizi: Nuk e kam dhe s’kam për ta pasur asnjëherë. Unë kam qenë i detyruar që të bëj një koalicion të natyrshëm më PD-në.
