Një ish-pjesëmarrës i Eurovision-it si mikpritës, 17 vende pjesëmarrëse, dy prej tyre për herë të parë, 12 pikë i mori San Marino dhe Malta fituese për të dytën herë në tri vjet. Kjo është një përmbledhje e asaj që ofroi edicioni i sivjetmë i garës “Junior Eurovision Song Contest”.
Orët e fundit është mbajtur gara “Junior Eurovision Song Contest”. Në total morën pjesë 17 shtete – numri më i madh i pjesëmarrësve në një periudhë goxha të gjatë. Në këtë garë u përfshinë për herë të parë dy vende debutuese, Australia dhe Irlanda ndërsa Shqipëria dhe Maqedonia u rikthyen pas një pushimi.
Gara u mbajt në Sofje të Bullgarisë, ndërsa për ta udhëhequr shoun u angazhua një emër i njohur i përcjellësve të Eurovisionit, Poli Genova, e cila përfaqësoi Bullgarinë në “Eurovision Song Contest” më 2011, raporton Koha.net. Sikurse në “Eurovision Song Contest”, edhe në këtë garë të të rinjve gjysma e rezultatit vjen nga juria dhe nga televotimi për të arritur deri tek rezultati final.
Malta mori 12 pikët e para qysh në televotimin e parë dhe kështu mbajti kryesimin që nga fillimi, kryesim që ia dolën ta mbajnë dhe përfunduan duke fituar para Armenisë që u radhitën në të dytin dhe Sllovenisë në të tretin.
Vlen të theksohet se Shqipëria, e cila u paraqit me Mishela Rapon me këngën “Dambaje”, në këtë garë zuri vendin e pestë me 93 pikë të tubuara, pothuajse sa gjysma e këngës fituese (Malta pati 185 pikë). Gjatë votimit, edhe San Marino ia doli që të fitonte 12 pikë që ishte edhe 12 pikëshi i parë për ta që u janë dhënë ndonjëherë në ndonjë ngjarje të Eurovisionit.
Lista e plotë e fituesve:
Malta 185 pikë
Armenia 176 pikë
Sllovenia 112 pikë
Bjellorusia 105 pikë
Shqipëria 93 pikë
Rusia 80 pikë
Serbia 79 pikë
Australia 64 pikë
Bullgaria 62 pikë
Gjeorgjia 51 pikë
Ukraina 38 pikë
Irlanda 36 pikë
Mali i Zi 36 pikë
San Marino 36 pikë
Holanda 35 pikë
Italia 35 pikë
Maqedonia 26 pikë
