Shqipëria e gatshme të presë refugjatë nga Siria
Gjirokastra është menduar të jetë vendi ku mund të qëndrojnë emigrantët sirianë, të cilët me afrimin e stinës së dimrit mund të ndryshojnë rrugën e nisur drejt vendeve të Bashkimit Europian.
Një Maqedoni në dëborë e ngrica, do t’i detyrojë ata të zgjedhin rrugëkalimin nga Greqia në Shqipëri – Mali i Zi – Kroaci.
E për pasojë Shqipëria pritet të jetë vendkalimi kryesor i sirianëve. Në këto kushte, Shqipëria do të ndihmojë Europën duke pritur refugjatët e luftës.
Nisur nga këto rrethana vendorëve në Gjirokastër u është kërkuar përcaktimi i hapësirave të përshtatshme për strehimin e tyre.
Prefekti i Gjirokastrës ndonëse i ka paraqitur Ministrisë së Brendshme hartën e territoreve ku mund të ngrihen kampet në një situatë të tillë, tha se infrastruktura do të ndërtohet vetëm në rastet e një fluksi real në pikën kufitare të Kakavijës.
Gadishmërinë e Shqipërisë për të rreshtuar krah vendeve të Europës për emigrantët sirianë e konfirmoi edhe kryetari i Kuvendit Ilir Meta gjatë një takimi që zhvilloi me ministren e Shtetit për Çështjet Evropiane të Landit të Bavarisë.
