Secili nga këta kafedashës duhet ta konsiderojë tjetrin një rrezik në periudhën e pandemisë, por infektimet alarmante të ditëve të fundit nuk duket të jenë shqetësim për këta kryeqytetas.
Lokalet në fundjavë, por jo vetëm janë të mbushura plot. Për ekspertët e shëndetësisë lokalet klasifikohen si një ndër vatrat më të mëdha të përhapjes së koronavirusit.
“Restorantet e lokalet janë të mbushura, qytetarë rrinë ngjitur me njëri-tjetrin, numri i rasteve rriten”.
Por për Komitetin Teknik të Ekspertëve masat e marra që konsistojnë së fundmi vetëm në rritjen e orës policore janë të mjaftueshme.
“Po bëhet një monitorim i vazhdueshëm dhe kundrejt gjobëvëniës për shkak të mos zbatimit të protokolleve të sigurisë”.
Për shkak të popullsisë së madhe dhe qarkullimit së dendur Tirana mbetet në krye të listës si qyteti me numrin më të lartë të të infektuarve. Aktualisht në të gjithë vendin janë mbi 34 mijë persona pozitiv me Sars Cov 2, prej të cilëve më shumë sesa gjysma jetojnë në kryeqytet.
Mbledhja e radhës e komitetit teknik të ekspertëve pritet të vlerësojë edhe respektimin e masave të marra nga baret dhe restorantet sidomos në ambientet e mbyllura.
