Vetëm pak javë pas takimit të tre ministrave të mjedisit; shqiptar, kroat dhe malazez në Dubrovnik, vjen hapi i parë që konkretizon bisedimet për shmangien e ndotjes së detit Adriatik. Ministri i Turizmit dhe Mjedisit, Blendi Klosi ishte i pranishëm në nënshkrimin e marrëveshjes së bashkëpunimit nga zv.Kryeministrja dhe Ministrja e Europës e Punëve të Jashtme të Kroacisë.znj Maria Pejcinovic Buric dhe koordinatori i OKB-së në Shqipëri, z.Brian Williams. Marrëveshja parashikon menaxhimin e ndotjes detare dhe bregdetare për rritjen e sigurisë në det dhe porte.
Ministri Klosi vlerësoi mbështetjen e dhënë nga qeveria kroate dhe organizata e Kombeve të Bashkuara.”Shpresojmë shumë që kjo të jetë vetëm faza e parë projektuese për të menaxhuar shumë herë më mirë derdhjen e ujërave të lumenjve në det duke i pastruar ato dhe për të pasur mundësinë që e gjitha kjo të jetë pjesë e procesit tonë “Clean and Green 2020” pasi është shumë e nevojshme që në hapjen e sezonit turistik këtë vit të kemi një situatë shumë më të pastër”- tha kreu i Turizmit dhe Mjedisit.
Koordinatori i UNDP-së në Tiranë,z, Brajan vlerësoi marrëveshjen si një shembull të përkryer bashkëpunimi midis dy vendeve që lagen nga e njëjta vijë bregdetare. Projekti i financuar nga qeveria kroate dhe zbatuar nga UNDP ka për objektiv krijimin e një rrjeti të përbashkët për parandalimin dhe reduktimin e rreziqeve të ndotjes së mjedisit detar por edhe menaxhimin e emergjencave si edhe forcimin e kapaciteteve të komuniteteve në Shqipëri për t’iu përgjigjur rreziqeve mjedisore dhe teknologjike të shkaktuara nga incidentet detare që rezultojnë ose mund të rezultojnë në derdhje të naftës ose substancave të tjera të rrezikshme dhe të dëmshme.
Fjala e plote e ministrit Klosi
Pas takimit të Dubrovnikut, biseda jonë për mbrojtjen e Adriatikut si një i tërë sot gjeti konkretizimin e parë nëpërmjet Organizatës së Kombeve të Bashkuara dhe organizatës së UNDP. U nënshkrua marrëveshja e parë e mbështetjes nëpërmjet qeverisë kroate për të projektuar një mbrojtjeje të plotë të detit Adriatik dhe duke filluar nga ndotjet që ndodhen në këtë det.
Shpresojmë shumë që kjo të jetë vetëm faza e parë projektuese për të menaxhuar shumë herë më mirë derdhjen e ujërave të lumenjve në det duke i pastruar ato dhe për të pasur mundësinë që e gjitha kjo të jetë pjesë e procesit tonë “Clean and Green 2020” apo projektit “Të pastrojmë Shqipërinë që duam” pasi është shumë e nevojshme dhe në hapjen e sezonit turistik të këtij viti ne të kemi një situatë shumë më të pastër në brigjet e detit dhe po ashtu të kemi një situatë shumë herë më të kontrolluar. Dua të falenderoj edhe Organizatën e Kombeve të Bashkuara e cila na bën të mundur që për herë të parë të vendosim edhe disa matësa shumë profesionalë të arsyeve pse ndotet bregdeti ynë.
Fjala e Brian Williams
Jam i lumtur të jem këtu në Ministrinë e Jashtme me Zotin Klosi dhe Qeverinë kroate e cila ka kontribuar me burime financiare për të ndihmuar autoritetet shqiptare për t’u përgatitur për menaxhimin e ndotjeve të rrezikshme nga aksidentet në det. Ky është një shembull i përkryer bashkëpunimi midis dy vendeve që lagen nga e njëjta vijë bregdetare, një vend europian- që ka vendosur mbrojtjen e mjedisit në qendër të zhvillimit të qëndrueshëm dhe në qendër të Integrimit Europian.
a.ç
