DOSSIER JAVANEWS/ Shqiptarët në të gjitha trevat ku ata banojnë renditen të parët në Europë për frymë popullsie sa i përket krijimit të partive politike. Padyshim vendin e parë për krijimin e subjekte politike ndër shqiptarë e mban Tirana zyrtare me 113 parti politike te regjistruara në Gjykatë. Në zgjedhjet e fundit lokale të 2015 morën pjesë 61 subjekte politike zgjedhore. Sipas të dhënave zyrtare të Gjykatës së Tiranës nga 1990-2013, janë regjistruar gjithsej 118 subjekte, duke shënuar kështu shifrat më të larta se në çdo vend të Europës. Pa përmendur këtu listën e partive të regjistruara rishtas si FRD, AKZ, PDIU, etj. Ndërkohë që numri i votuesve në zgjedhjet e 23 qershorit 2013 të thirrur të merrnin pjesë në votime ishte 3.2 milionë shtetas, 157 mijë prej të cilëve votues për herë të parë.
Në Republikën e Kosovës me një popullsi rreth 2 milion banorë shqiptarët kanë arritur të krijojnë në letra mbi 80 parti, aq sa në zgjedhjet lokale të 2013 u futën në garë 105 subjekte politike. Ndërsa në Malin e Zi ku shqiptarët janë diku tek 50 mijë banorë dhe me rreth 30 mijë votues ekzistojnë 6 subjekte politike dhe në Luginën e Preshevës janë 7 parti politike.
Natyrshëm lind pyetja se cila është arsyeja e krijimit të kaq shumë partive politike ndër shqiptarë? Duket se një element i përbashkët gjendet në faktin se partitë janë “parti kryetarësh” dhe jo idesh apo vlerash përfaqësuese. Po t’i analizosh programet apo statutet e partive politike shqiptare pjesa më e madhe e tyre janë kopje të mira dhe të këqija të partive të tjera, ku me vështirësi gjen ndonjë faktor dallues. Dalldia e formimit të partive politike ndër shqiptarë ka krijuar një inflacion zhvlerësues të dobësimit të komuniteteve përballë qeverisjeve. Programet qeverisëse në të shumtën e rasteve e këtyre subjekteve politike reduktohet në menaxhimin pushtetit sesa në përfaqësim komuniteti. Disa subjekte duke u bërë palë dhe ndër-palë me pushtetin kanë fuqizuar dukshëm ndërmjetësimin personal kundrejt atij institucional.
(javanews.al) Me. Ar
