Policia e Shtetit për tju ardhur në ndihmë tifozëve që duan të shkojnë në Elbasan si dhe të gjithë përdoruesëve të rrugës Elbasan -Tiranë dhe anasjelltas bën me dije se:
Lëvizja me automjet nga Elbasani për në Tiranë nëpërmjet tunelit do të jetë e lirë deri në orën 17.00 të ditës së sotme.
Ndërsa lëvizja nga Tirana për në Elbasan nëpërmjet tunelit do jetë e lirë deri në orën 17.30 po të ditës së sotme.
Pas këtij orari sipas kahut të lëvizjes, tuneli do të bllokohet dhe lëvizja do të kryhet nga Durrësi.
“Policia e Shtetit ka marrë të gjitha masat për mbarëvajtien e këtij aktiviteti sportiv, me të njëjtin përkushtim e seriozitet si për çdo ndeshje tjetër ndërkombëtare që është zhvilluar në vendin tonë”, thuhet në njoftimin për mediat të policisë.
Sipas raportimeve, në mbarëvajtjen e ndeshjes, janë angazhuar më shumë se 2 mijë efektivë të policisë, ku përfshihen edhe Forcat e Ndërhyrjes së Shpejtë dhe ato RENEA. Në hyrje policia do të ushtrojë kontrolle të rrepta për ndalimin e mjeteve të ndaluara.
Kontrolle po ushtrohen edhe në ambjentet përreth impiantit, pasi frika për incidente të mundshme është shtuar ndjeshëm pas informacioneve të strukturave antiterror, vendase dhe të huaja për akte terroriste. Pak ditë më parë në Shkodër u arrestuan 4 persona që dyshohet se ishin pjestëarë të ISIS dhe do kryenin sulm në srtadiumin e Shkodrës, ku ishte parashikuar fillimsht të krhyej ndeshja./a.m.
