Kandidatja për bashkinë e Durrësit, Grida Shqina (Duma) takoi banorët e lagjes së Spitallës dhe Porto Romanos të cilët i siguroi për vullnetin e saj për mirëmbajtjen dhe urbanizimin e këtyre zonave.
Sipas deklaratës së Partisë Demokratike, banorët u shprehën se janë jashtë vëmëndjes së bashkisë teksa ata vuajnë mungesën e ujit të pijshëm, kanalizimeve, ndotjes e përmbytjeve të shpeshta.
“Ajo që u siguroj unë sot është që minimalisht ato gjëra që duhet të bëhen menjëherë, të bëhen. Pra plehrat të bëhen menjëherë, heqja e plehrave në zonat e banuara të bëhet menjëherë, pastrimi i kanaleve duhet të bëhet menjëherë. Këto nuk kërkojnë buxhete të papara. Kërkojnë vullnet për mirëmbajtjen. Problemet në çdo zonë të Durrësit janë me dhjetra dhe listën mund ta çojmë me qindra”, tha Shqina.
“Kandidatja për bashkinë Durrës u njoh edhe me problemet sociale dhe ekonomike të kësaj zone. Ajo tha se punësimi do të jetë kolona kryesore për qytetin” – thotë PD në e-mailin e shpërndarë për media.
